मैथिल समाज रहिका, मधुबनीक तीन दिवसीय मिथिला विभूति समारोह आ ताहिमे देबय जायवाला पुरस्कार सभक घोषणा भऽ गेल अछि।
प्रो शीतलांबर झा महासचिव, मैथिल समाज रहिका , मधुबनी प्रेस विज्ञप्ति जारी कय बतौलनि कि प्रत्येक वर्षोंक भांति एहू वर्ष मैथिल समाज रहिका 29 , 30 एवं 31 मार्च केँ 52म त्रिदिवसीय मिथिला विभूति स्मृति पर्व समारोह आयोजित करत।
एहि अवसर पर संस्था द्वारा देबय जायवाला चारु प्रतिष्ठित पुरस्कारक घोषणा कय देल गेल अछि। किरण पुरस्कार.. मैथिली भाषाक प्रसिद्द कथाकार , लेखक , कवि हीरेंद्र कुमार झाक कथा संग्रह ‘परगोत्री’केँ चायनित कयल गेल अछि।
‘यात्री पुरस्कार’क लेल प्रसिद्द कवि , रचनाकार अशोक कुमार मेहताक कविता संग्रह ‘पंछी बनी गगन केर’ चयनित कयल गेल अछि।
‘रवींद्र-महेन्द्र सम्मान’ पुरस्कार एहि वर्ष मैथिली मंचक प्रसिद्द लोकप्रिय गायक विकास झाकेँ देल जाएत।
‘मैथिली सेनानी चुनचुन मिश्र सम्मान’ पुरस्कार मैथिली सेनानी , मैथिली अकादमीक पूर्व अध्यक्ष एवं प्रसिद्द उदघोषक कमला कांत झाकेँ देल जाएत।
प्रो झा कहलनि पहिने किरण पुरस्कार एवं यात्री पुरस्कारमे संस्था द्वारा ग्यारह हजार रुपया, प्रशस्ति पत्र एवं मिथिलाक परम्पराक मुताबिक अभिनंदन कयल जाइत छल, एहि वर्षसँ एहि दुनू पुरस्कारक राशि केर बढ़ाकऽ पंद्रह हजार रुपया देल जाएत। तहिना रवींद्र महेंद्र पुरस्कारमे पांच हजार रुपया देल जाइत छल जकरा बढ़ाकऽ ग्यारह हजार रुपए कऽ देल गेल अछि।
ओ कहलनि अछि, एहि अवसर पर देशक नामचीन मैथिली भाषाक विद्वान, कवि ,प्रसिद्द गायक एवं गायिका, जनप्रतिनिधि एवं समाजसेवीकेँ आमंत्रित कयल जा रहल अछि।
बधाई देबयवालामे संस्थाक अध्यक्ष, पूर्व विधान पार्षद सुमन कुमार महासेठ, संस्थाक संस्थापक सदस्य उदय चंद्र झा विनोद , जटाधार पासवान , मो सनाउल्लाह रहमानी मुखिया, डॉ हेमचंद्र झा, चंद्रकिशोर मंडल , मिथिलेश झा मुखिया , मधु राय , भवेश कुमार झा, शंकरदत्त मिश्र , राजू झा , राकेश झा, ललन मंडल , राजू पासवान, संजीव पाठक , उदय भूषण निराला , जिला पार्षद उमर अंसारी , राजेंद्र यादव , पवन कुमार झा ,अनिल कुमार झा , कुमार गौरव , कामेश्वर कामत शिव कुमार झा , शशिधर झा , बबलू झा , सुधीर मंडल आदि छथि।
