मोतिहारीमे प्रशांत किशोर एकटा पैघ घोषणा करैत कहलनि जे जँ बिहारमे हुनक पार्टीक सरकार बनत तँ शपथग्रहण समारोहक मात्र एक घण्टाक बाद शराबबंदी हटा लेल जायत। जन सूरज पार्टीक संस्थापक प्रशांत किशोर तेजस्वी यादवक सीट राघोपुरसँ विधानसभा चुनाव लड़ि सकैत छथि। ओ स्वयं बृहस्पति दिन तेजस्वीकेँ खिलाफ चुनाव लड़बाक संकेत देलनि।
जन सुराज उदघोष यात्राक दौरान प्रशांत किशोर पूर्वी चम्पारणमे एकटा संवाददाता सम्मेलनकेँ सम्बोधित कयलनि। विधानसभा चुनाव लड़बाक बारेमे पूछला पर प्रशांत किशोर कहलनि जे जँ पार्टी निर्णय लेत तऽ ओ जरूर चुनाव लड़ताह। पार्टीक निर्णय अंतिम निर्णय होयत। पीके उल्लेख कयलनि जे राघोपुरक एकटा कार्यकर्ता चुनाव लड़बाक लेल हुनक नाम पर आवेदन कयने छथि। मुदा, एखनि धरि ई तय नहि भेल अछि जे ओ कतयसँ चुनाव लड़ताह।
वास्तवमे बिहारमे विधानसभा चुनाव लड़बाक लेल जन सूरज पार्टीमे आवेदन स्वीकार कयल जा रहल अछि। उल्लेखनीय अछि जे राघोपुरक वर्तमान विधायक तेजस्वी यादव छथि आ राघोपुर लालू परिवारक गढ़ मानल जाइत अछि।
प्रशांत किशोर भाजपा पर हमला करैत कहलनि जे जँ बिहारमे शराबबंदी एतेक प्रभावी अछि तखनि पीएम मोदी एकरा पूरा देश आ भाजपा शासित राज्यमे सेहो लागू किएक नहि करैत छथि ? शराबबंदी पर प्रशांत किशोर दोहरबैत कहलनि जे बिहारमे शराबबंदीक नाम पर मात्र दोकान बंद अछि। शराब एखनो घर पर पहुँचाओल जा रहल अछि। जँ विकास शराबबंदी’सँ आबि रहल अछि तखनि पीएम मोदीकेँ एकरा पूरा देशमे लागू करबाक चाही। कमसँ कम हुनका उत्तर प्रदेशमे शराबबंदी लागू करबाक प्रयास करबाक चाही। ई मिठाई मात्र बिहारक लोककेँ किएक देल जा रहल अछि?
पीके कहलनि जे शराबबंदीक कारण बिहारक हजारो करोड़ रुपयाक नुकसान भऽ रहल अछि आ ई पैसा मात्र अधिकारी, राजनेता आ माफियाक हाथमे जा रहल अछि। ओ कहलनि जे जँ बिहारमे हुनक पार्टीक सरकार बनैत अछि तँ सरकार बनलाक एक घंटाक भीतर शराबबंदी हटा लेल जायत।
