कर्ण कायस्थ महासभाक केन्द्रीय समितिक द्विवर्षीय (2025-2027) कार्यकालक चुनाव सम्पन्न भेल। एहि चुनावमे सी.ए. आशीष नीरज – राष्ट्रीय अध्यक्ष, रमेश कुमार-राष्ट्रीय उपाध्यक्ष (निर्विरोध), आनंद दास-राष्ट्रीय महासचिव (निर्विरोध), इरा मल्लिक- राष्ट्रीय सचिव आ कुमार रंजीत – राष्ट्रीय कोषाध्यक्ष निर्वाचित भेलाह।
अध्यक्ष पदक लेल भेल चुनावमे आशीष नीरजकेँ कुल पड़ल 340 मतमे सँ 315 मत प्राप्त भेलन्हि। संस्थाक नवनियुक्त अध्यक्ष आशीष नीरज बतौलथि, जे महासभाक द्वारा कुंदन कर्णकेँ मुख्य चुनाव अधिकारी एवं शैलेश कुमारकेँ सहायक चुनाव अधिकारी नियुक्त कयल गेल छल। चुनाव प्रक्रिया आनलाईन संपादित भेल। चुनावकेँ सफलतासँ संपादित करय हेतु दूनू चुनाव अधिकारीकेँ विशेष धन्यवाद देल गेल।
विदित होय कि कर्ण-कायस्थ महासभा सोसायटी एक्टकेँ अंतर्गत 2018 सँ निबंधित संस्था अछि। कर्ण कायस्थ महासभाक फेसबुक ग्रुपसँ लगभग 38 हजार कर्ण कायस्थ एक दोसरसँ जुड़ल छथि। संस्थाक निवर्तमान अध्यक्ष चंद्रमोहन लाल दास नव समितिकेँ स्वागत कयलन्हि आ आशा व्यक्त कयलन्हि की आबय वला समयमे संस्था सामाजिक एवं साहित्यिक विकास लेल अग्रसर होयत।
