भूकम्पक कारण कोनो क्षतिक सूचना समाचार सम्प्रेषण तक नहि भेटल छल। एहिसँ पहिने १७ फरवरीकेँ राष्ट्रीय राजधानी दिल्लीमे भूकम्पक तेज झटका महसूस कयल गेल छल।
उत्तराखंडमे भूकम्पक झटका महसूस कयल गेल अछि। रिक्टर पैमाना पर भूकम्पक तीव्रता ३.५ मापल गेल छल। भूकम्पक केन्द्र पिथौरागढ़मे छल, जखनि कि एकर गहराई पृथ्वीक सतहसँ ०५ किलोमीटर नीचा छल। एखन धरि भूकम्पक कारण कोनो हताहतक सूचना नहि भेटल अछि। झटकाक बाद लोक अपन घर खाली करा देने छथि।
खबैरक अनुसार, उत्तराखण्डक पिथौरागढ़सँ सटल किछु क्षेत्रमे काल्हि साँझ ७:१६ बजे भूकम्पक झटका महसूस कयल गेल। भूकम्पक अक्षांश २९.८५ उत्तर आ देशान्तर ८०.५२ पूर्व बतायल गेल छल। कहल जा रहल अछि जे झटका हल्का छल, तेँ एखन धरि कोनो क्षतिक जानकारी सोझाँ नहि आयल अछि।
उत्तराखंडसँ पहिने सोमदिन राजधानी दिल्ली आ बिहारमे सेहो भूकम्पक तेज झटका महसूस कयल गेल छल। रिक्टर स्केल पर भूकम्पक तीव्रता ४ मापल गेल छल। भूकंपक केंद्र धौला कुंआक लगपास दर्ज कयल गेल छल। भोर ५:३६ बजे आयल भूकम्प दिल्लीक निवासीकेँ चौंका देने छल।
भूकम्पक केन्द्र पृथ्वीक सतहसँ मात्र ५ किलोमीटर गहींर छल। एहिसँ धौला कुआं क्षेत्र आ ओकर लगपासमे गड़गड़ाहटक आवाज सुनल गेल। तेज आवाजक संग तेज झटकाक बाद लोक अपन घरसँ बाहर निकलि गेल छल।
वैज्ञानिकसभक अनुसार, दिल्लीमे आयल भूकम्प प्लेट टेक्टोनिक्सक कारण होयबाक बदला एहि क्षेत्रक भूवैज्ञानिक विशेषतासभमे प्राकृतिक परिवर्तनक परिणाम अछि।
उत्तर भारतक दिल्ली-एनसीआर क्षेत्रमे सबसँ बेसी भूकम्पक झटका अबैत अछि। दिल्लीमे भूकम्पक झटका तखनो महसूस कयल जाइत अछि जखनि सम्भावित दूरस्थ आ लगपासक स्थानपर भूकम्प अबैत अछि।
राष्ट्रीय भूकम्प विज्ञान केन्द्रक निदेशक ओपी मिश्रक रिपोर्टक अनुसार, २००७ मे धौला कुआं क्षेत्रमे ४.६ तीव्रताक भूकम्प आयल छल। मुदा, एकर प्रभाव सोमदिनक भूकम्प जकाँ तीव्र नहि छल किएक तँ एकर उपरिकेंद्र १० किलोमीटरक गहराईमे छल। दिल्लीकेँ भूकंपीय क्षेत्र-४मे वर्गीकृत कयल गेल अछि, जे देशक दोसर सबसँ खतरनाक क्षेत्र अछि। एहि क्षेत्रमे पहिने भूकम्प आबि चुकल अछि आ ई कोनो नव क्षेत्र नहि अछि।
