बिहार लोक सेवा आयोग (बीपीएससी)क ७०म प्रारंभिक परीक्षा रद्द करबाक माँग करैत अभ्यर्थी सभक आन्दोलन एखनो जारी अछि। एम्हर बीपीएससी बुधदिन मुख्य परीक्षाक तिथि घोषित कऽ देलक अछि। मुख्य परीक्षा २५ अप्रैलसँ शुरू होयत, जखन कि उम्मीदवार १७ मार्च धरि ऑनलाइन आवेदन जमा कऽ सकैत छथि।
बीपीएससी’क परीक्षा नियंत्रक द्वारा जारी जनतबक अनुसार 70वीं प्रारंभिक परीक्षा पास कएनिहार अभ्यर्थीक लेल लिखित परीक्षा 25 अप्रैलसँ शुरू होएत आ 30 अप्रैल तक चलत। ई परीक्षा दू पालीमे आयोजित होएत। एहि परीक्षामे भाग लेबाक लेल उम्मीदवार ऑनलाइन आवेदन कऽ सकैत छथि।
जनतबक अनुसार एकीकृत 70 वीं संयुक्त मुख्य (लिखित) प्रतियोगी परीक्षाक अनिवार्य विषयक परीक्षा 25 अप्रैलसँ 30 अप्रैल तक पटना मुख्यालय स्थित परीक्षा केंद्र पर आयोजित कयल जायत। 25 अप्रैलकेँ सामान्य हिन्दी परीक्षा प्रातः 9:30 बजेसँ 12:30 बजे तक होएत, जखनि कि निबंध परीक्षा दोसर पालीमे ओही दिन दुपहर 2 बजेसँ 5 बजे तक होएत। २६ अप्रैलकेँ सामान्य अध्ययन (पेपर १) परीक्षा भोर १० बजेसँ दुपहरिया धरि होयत, जखन कि सामान्य अध्ययन (पेपर द्वितीय) परीक्षा २८ अप्रैलकेँ आयोजित कयल जायत। २९ अप्रैलकेँ परीक्षा दुनू पालीमे होयत आ ३० अप्रैलकेँ मात्र एकटा पालीमे वित्तीय प्रशासनिक अधिकारीसँ सम्बन्धित वैकल्पिक विषय परीक्षा होयत।
जे अभ्यर्थी ७०म प्रारंभिक परीक्षा उत्तीर्ण कयने छथि ओ २१ फरवरीसँ ऑनलाइन आवेदन जमा कऽ सकैत छथि। आवेदन भरबाक अंतिम तिथि 17 मार्च अछि।
उल्लेखनीय अछि जे बिहार लोक सेवा आयोग द्वारा आयोजित ७०म प्रारंभिक परीक्षा रद्द करबाक आ फेरसँ परीक्षा देबाक माँग करैत आन्दोलन चलि रहल अछि। मंगलदिन पटनामे सेहो विरोध प्रदर्शन भेल। मंगलदिन पटनामे छात्र आ शिक्षक सड़क पर उतरि परीक्षा रद्द करबाक माँग करैत विरोध प्रदर्शन कयलनि।
