पंडौल थानांतर्गत पचाढ़ी गामक स्वतंत्रता सेनानी बिजली देवीक शताधिक वर्षमे ०७ फरवरी, शुक्रकेँ निधन भऽ गेल। ओ अपन आयुक सय वर्ष पार कय गेल छलीह। हुनकर निधनसँ सम्पूर्ण पचाढ़ी ग्रामवासी सहित हित-मित-संपर्कित शोकाकुल भऽ गेलथि।
विदित होय जे श्रद्धेय बिजली देवी प्रसिद्ध चर्चित समाजसेवी ओ धर्मज्ञ प्रफुल्ल चंद्र झा’क माता छलीह। प्रशासनिक अधिकारी पंडौल थानाध्यक्ष मो. नदीम, एसआई चंद्रदीप ठाकुर सहित अनेक पुलिसकर्मी आ सरकारी कर्मचारी एवं शताधिक ग्रामवासीक उपस्थितिमे राजकीय सम्मानक संग हुनक गाम पचाढ़ीमे हुनक अंतिम संस्कार कयल गेल। पुत्र प्रफुल्ल चंद्र झा हुनका मुखाग्नि देलनि आ एहि तरहसँ ओ पंचतत्वमे विलीन भेलीह।
जनतब जे स्वर्गीय स्वतंत्रता सेनानी बिजली देवीक पति स्व. भोगेन्द्र झा सेहो स्वतंत्रता सेनानी छलथि आ स्वतंत्रता आन्दोलन १९४२ संग्रामक अग्रिम पंक्तिक वीर सेनानी छलथि।
स्व. बिजली देवीक प्रायः पूरा परिवारक शौर्य गाथा अछि। ओ स्वयं स्वतंत्रता सेनानी, धर्म परायण, प्रखर वक्ता, त्यागी, परोपकारी ओ समाजसेवी छलीह। हुनक पुत्र प्रफुल्ल चंद्र झा सेहो सतत समाजसेवा एवं धार्मिक गतिविधिमे तल्लीन रहैत छथि आ सदा दीन ओ असहाय सभक लेल बिना कोनो अपन परवाहक ठाढ़ आ समर्पित रहैत छथि।
