२७ साल, ६टा विधानसभा चुनाव आ दिल्लीमे भाजपाकेँ सत्तासँ दूर रहलाक बाद २०२५ केर विधानसभा चुनावमे भाजपा ४८ सीट जीत दर्ज कयलक। पिछला तीन लोकसभा चुनावमे भाजपा पर स्नेह बरसनिहार दिल्लीक जनता एहि विधानसभा चुनावमे सेहो कमल खिलवा देलक।
भाजपाक लेल एहि परिणामक अर्थ दिल्लीमे सत्तासँ २७ सालक निर्वासनक अन्त अछि, जखनि कि पार्टीक वर्तमान दिग्गज मोदी आ शाहक लेल ई राहतक सांस अछि। मोदी-शाह युगमे भाजपा उत्तरसँ दक्षिण धरि अपन सत्ताक झण्डा बुलंद कयने अछि, लगभग सभ क्षेत्रीय दलकेँ पराजित कऽ कांग्रेसकेँ खोखला कऽ देलक, मुदा दिल्लीमे अपन नाकक नीचा अरविंद केजरीवाल आ हुनकर आम आदमी पार्टी (आप) अजेय प्रतीत होइत छल।
भाजपा पछिला चुनावक तुलनामे एहि बेर बेसी जमीनी जुड़ावक संग काज कयलक। किछु मास पहिने हरियाणा आ महाराष्ट्रमे संगगठनक गहन अभियानक कारण एकटा चमत्कार भेल छल। लोकसभा चुनावक बाद दुनू राज्यमे विधानसभा चुनाव भेल छल। लोकसभा चुनावमे भाजपाकेँ झटका लागल। हरियाणामे जखनि भाजपा तत्कालीन मुख्यमंत्री मनोहर खट्टरक स्थान पर नायब सिंह सैनीकेँ नियुक्त कयलक, तखनि ई सन्देश देलक जे हरियाणा विधानसभा चुनावक सम्बन्धमे भाजपाकेँ कठिनाई अनुभव भऽ रहल छल। आ मात्र चारि दिन पहिने कयल गेल एहि घोषणाक मध्यम वर्गपर महत्वपूर्ण प्रभाव मानल जा रहल अछि।
जनतब देब जे भाजपा अन्तिम बेर 1993मे दिल्लीमे विधानसभा चुनाव जीतल छल। पछिला किछु चुनावमे भाजपा पीएम मोदीक चेहरा आगू राखि दिल्लीमे प्रचार कयने छल, मुदा जीतसँ दुरी बनल रहल। एम्हर राज्य स्तर पर ई कतेको बेर अपन नेतृत्व बदललक, मुदा एकर लाभ नहि भेटल। एहि बेर भाजपा सेहो मुख्यमंत्रीक लेल कोनो चेहरा प्रस्तुत नहि कयलक, मुदा पार्टी पीएम मोदीक नाम पर जीत प्राप्त करबामे सफल रहल
दिल्लीमे विधानसभा चुनावक लेल मतदान ५ फरवरीकेँ भेल छल आ परिणामक घोषणा काल्हि ०८ फरवरीकेँ भेल।
आम आदमी पार्टी एही ७० विधानसभाक सीटमे सँ मात्र २२ सीट प्राप्त कयलक आ सत्तासँ बहार भेल। पार्टीक प्रमुख आ पूर्व मुख्यमंत्री अरविन्द केजरीवाल नई दिल्ली सीटसँ प्रवेश वर्मासँ ४०८९ मतसँ पराजित भेलथि।
एम्हर मुख्यमंत्री आतिशी दिल्ली विधानसभा चुनावक बारहम चरणक गिनतीक अन्तमे कालकाजी सीटसँ भाजपाक प्रतिद्वंद्वी रमेश बिधूड़ीकेँ ३५२१ मतसँ पराजित कयलनि, जेना कि निर्वाचन आयोगक वेबसाइटसँ पता चलल।
दिल्ली चुनावमे कांग्रेस ध्वस्त भऽ गेल, लगातार तेसर बेर ७० सदस्यीय विधानसभामे अपन खाता खोलबामे विफल रहल आ ओकर प्रमुख उम्मीदवारसभकेँ करारी पराजयक सामना करय पड़ल। कांग्रेस इहो जोर देलक जे ओ २०३० मे राष्ट्रीय राजधानीमे सरकार बनओत।
कांग्रेस शनिकेँ कहलक जे दिल्ली विधानसभा चुनावक परिणाम प्रधानमंत्री नरेन्द्र मोदीक नीतिक पुष्टि नहि अछि बल्कि अरविंद केजरीवाल आ आम आदमी पार्टी पर जनमत संग्रह अछि।
दिल्ली विधानसभा चुनाव २०२५क लेल मतदान ५ फरवरीकेँ सम्पन्न भेल जाहिमे कुल ६०.३९% मतदान भेल। सबसँ बेसी मतदान मुस्तफाबादमे (६९%) भेल। सबसँ कम करोल बागमे (४७•४०%) छल।
