मीसा भारती कहलनि जे एहि बेर जनता सेहो तैयार अछि। ओ एम्हर-ओम्हर वोट नहि देबए जा रहल छथि। सभ वोट इंडिया गठबंधनक उम्मीदवारक जीताबयमे पड़त।
एहि साल बिहारमे विधानसभा चुनाव हेबाक अछि आ राजगक नेताक दावा अछि जे ओ २२५ सीट जीतत। चुनावसँ पहिने राजद एहेन दावा पर हमला केलक अछि। पाटलिपुत्र लोकसभा सीटक सांसद आ राजद सुप्रीमो लालू प्रसाद यादवक पैघ बेटी मीसा भारती राजग नेतासभ पर कटाक्ष करैत कहलनि अछि जे ‘मशीन (ईवीएम) सेट कऽ रहल हेताह वा करवा रहल हेताह।’
हालहिमे उपमुख्यमंत्री सम्राट चौधरी कहने छलाह जे २०२५ मे भाजपा २२५ सीट जीतत। एकर जवाब दैत मीसा भारती रविदिन (२६ जनवरी, २०२५) संवाददाता सभक सङ्ग बातचीतमे ई बात कहलनि। सीधा ओ ईवीएमसँ छेड़छाड़क बात केर दोहरौलनि अछि। ओना, ओ इहो कहलनि जे एहि बेर जनता सेहो तैयार अछि। ओ कतौह एम्हर-ओम्हर वोट नहि देबए जा रहल छथि। सभ वोट इंडिया गठबंधनक उम्मीदवारक जीतक लेल पड़त।
उल्लेखनीय अछि जे विधानसभा चुनावमे एखनो किछु मास बचल अछि, मुदा दल सभ तैयारी कऽ रहल अछि। जदयू नेता अशोक चौधरी होइथ वा भाजपाक सम्राट चौधरी, ओ सभ २०२५ केर चुनावमे २२५ सीटक लक्ष्य रखलनि अछि। राजगक कहब अछि जे चुनाव मुख्यमंत्री नीतीश कुमारक नेतृत्वमे लड़ल जायत। एकरा बारेमे कोनो दू मत नहि अछि।
जनतब जे चुनावसँ पहिने मीसा भारती ईवीएम केर लऽकऽ सत्तारूढ़ दल पर हमला कयलनि, मुदा ई पहिल मामिला नहि अछि। कांग्रेसक सङ्ग-सङ्ग आम आदमी पार्टी आ बिहार सहित देश भरिक कतेको अन्य दल ईवीएमपर हारक बाद ईवीएमसँ छेड़छाड़ आ गड़बड़ी करबाक आरोप लगओलक अछि। ई देखय पड़त जे मीसा भारतीक एहि बयानक बाद सत्तारूढ़ दलक की प्रतिक्रिया अबैत अछि।
