मध्य प्रदेश मंत्रिमंडल बुधदिन १७ धार्मिक क्षेत्रमे शराबपर प्रतिबन्ध लगयबाक निर्णय लेलक। एकर अलावा मंत्री सबकेँ अपन विभागक स्थानांतरणक अधिकार सेहो देल गेल अछि।
मुख्यमंत्री मोहन यादव कहलनि जे राज्य सरकार धीरे-धीरे शराबबंदी दिसि बढ़ि रहल अछि आ एकर तहत राज्यक 17 जगह पर शराब पर रोक लगेबाक निर्णय लेल गेल अछि। जाहि ठाम शराबपर रोक लगा देल गेल अछि ओहिमे एकटा नगर निगम क्षेत्र, छओ नगरपालिका, छओ नगरपालिका परिषद आ चारिटा ग्राम पंचायत क्षेत्र सम्मिलित अछि। एहिमे मुख्य रूपसँ उज्जैनक नगर निगम क्षेत्र सम्मिलित अछि। दतिया, पन्ना, मंडला, मंदसौर, मैहर, नगर परिषद क्षेत्र ओंकारेश्वर, महेश्वर ओरछा, चित्रकूट, अमरकंटक नगरपालिका क्षेत्रमे सेहो शराबपर रोक लगा देल गेल अछि।
कहल गेल अछि जे जाहि क्षेत्रमे शराब पर प्रतिबंध अछि ओहि क्षेत्रक शराबक दोकानकेँ दोसर जगह पर स्थानांतरित सेहो नहि कयल जायत। ओ आगू कहलनि जे मंत्री सभकेँ विशेष परिस्थितिमे अपन विभागक स्थानान्तरण करबाक अधिकार देल गेल अछि। आबयवला समयमे औपचारिक स्थानांतरण नीति बनत।
मंत्रिमण्डलक बैसारसँ पहिने मुख्यमंत्री सहित राज्य सरकारक सभ मंत्री नर्मदा नदीक कातमे विशेष पूजा आ आरती कयलनि। ओकर बाद ओ महेश्वरमे स्थित रानी अहिल्याबाईक किलाक भ्रमण कयलनि। संगहि ओ हुनक सिंहासनकेँ सेहो प्रणाम कयलनि।
मोहन यादव सरकारक मंत्रिमंडलक पहिल गंतव्य बैठक महेश्वरमे भेल। ई बैसार रानी अहिल्याबाईक ३००म जयन्तीकेँ समर्पित छल।
मुख्यमंत्री मोहन यादव कहलनि जे राज्य सरकार धरोहरकेँ सभ तक पहुंचाबय केर प्रयासमे लागल अछि। रानी अहिल्याबाईक ३००म जयन्तीक अवसर पर पूरा राज्यमे विभिन्न कार्यक्रमक आयोजन कयल गेल अछि।
