बिहारमे ठंढाक दोहरा हमला होइत देखल जा रहल अछि। घनगर कुहेसक बीच पछुआ हवा बेसी तबाही मचाओत। बिहारमे जाड़सँ राहतक आशामे रहनिहार लोकसभकेँ सेहो बृहस्पति दिन निराशा भेटल। मौसम विभाग कहलक अछि जे बिहारमे एखनि जाड़ बाकी अछि। अगिला दू दिनमे राज्यक न्यूनतम तापमानमे २ सँ ३ डिग्रीक गिरावट आबि सकैत अछि। संगहि ठंढ़ीसँ राहत भेटबाक कोनो संभावना नहि अछि।
मौसम विभाग अगिला दू दिन धरि राज्यक कतेको जिलामे ठंढ़ा आ घनगर कुहेसक चेतावनी जारी कयलक अछि। एकर अन्तर्गत दृश्यताक कमीक कारण लोकसभकेँ सावधानीपूर्वक वाहन चलयबाक निर्देश देल जा रहल अछि। मौसम विज्ञान केन्द्र पटना द्वारा जारी पूर्वानुमानक अनुसार अगिला तीन दिन धरि बिहारक सभ जिलामे मध्यमसँ घनगर कुहेस रहबाक सम्भावना अछि। अगिला २४ घंटामे कैमूर, रोहतास, गया, नालंदा, नवादा, जहानाबाद आ अरवल जिलामे मध्यम हवा चलबाक सम्भावना अछि।
अगिला तीन दिन धरि एहि जिलासभमे न्यूनतम तापमान १० सँ १४ डिग्री सेल्सियस रहबाक सम्भावना अछि। मौसम विभागक अनुसार, पश्चिमी विक्षोभक प्रभावसँ लगभग पूरा राज्यमे कुहेस देखल जा सकैत अछि। मौसम विभाग राज्यक कतेको जिलामे घनगलर कुहेसक चेतावनी जारी कयलक अछि। कटिहार, किशनगंज, सीतामढ़ी, अररिया, सुपौल, मधुबनी, सहरसा, सारण, पूर्णिया, भागलपुर सहित कतेको जिलामे घनगरसँ बहुत घनगर कुहेसक चेतावनी जारी कयल गेल अछि। संगहि राज्यमे बरखा होयबाक सम्भावना अछि। विभाग २७ जनवरीकेँ बरखा होयबाक पूर्वानुमान व्यक्त कयलक अछि।
