मैथिली साहित्य महासभा (मैसाम) केर तत्वावधानमे दिनांक 12 जनवरी 2025 केँ आयोजित बैसारमे आगामी 21 फरवरी 2025 कें अंतरराष्ट्रीय मातृभाषा दिवस केर अवसर पर वार्षिक संगोष्ठी ओ वसंतोत्सव संग मैथिली साहित्य महासभा केर दसम वार्षिकोत्सव एकसंग मनबैत एहिमे भव्य कवि गोष्ठी ओ ‘आचार्य रामलोचन शरण : व्यक्तित्व ओ कृतित्व’ विषय पर वार्षिक संगोष्ठी संग भव्य सांस्कृतिक संध्याक आयोजन करबाक निर्णय सर्वसम्मतिसँ लेल गेल।
बैसारमे मैसाम अध्यक्ष राहुल झा द्वारा मैसामक गतिविधिमे एकटा नव अध्याय जोड़बाक प्रस्ताव देल गेल। जाहिमे ओ मैथिलीमे सुदीर्घ साहित्य साधना कयनिहार सुयोग्य साहित्यकारकेँ ‘मैसाम सम्मान’ देबाक प्रस्ताव दैत एहि अंतर्गत नगद सम्मान राशि 31000/- रुपयाक संग मिथिला चित्रकलासँ सुसज्जित पाग-दोपटा आ प्रशस्ति पत्र प्रदान कयल जयबाक अपन मंतव्य रखलनि। अध्यक्ष केर एहि प्रस्तावक करतल ध्वनिसँ स्वागत करैत उपस्थित सदस्य लोकनि सर्वसम्मतिसँ एकरा पारित कयलनि।
बैसारमे सम्यक विचारोपरांत मैसाम दिसिसँ साल 2025 लेल पहिल *मैसाम सम्मान* मैथिलीक साहित्यकार डॉ वीरेंद्र मल्लिककें प्रदान कयल जयबाक निर्णय सर्वसम्मतिसँ लेल गेल।
