मनोज झा कहलनि जे पार्टी कतेको महत्वपूर्ण निर्णय लेने अछि। रामचन्द्र पूर्वेकेँ संगठनात्मक चुनावक लेल मुख्य निर्वाचन अधिकारी नियुक्त कयल गेल अछि। बैसारमे कतेको राजनीतिक प्रस्तावपर चर्चा भेल।
राजद राष्ट्रीय कार्यकारिणीक बैठक संपन्न भऽ गेल अछि। शनिदिन भेल बैसारक दौरान बहुत रास महत्वपूर्ण निर्णय लेल गेल, जकर मुख्य उद्देश्य पार्टीक संगठनकेँ मजबूत केनाइ आ आगामी बिहार विधानसभा चुनावक तैयारी पर ध्यान केन्द्रित केनाइ छल। बैसारक बाद पार्टी सांसद मनोज झा मीडियासँ बात करैत कहलनि जे संगठनात्मक प्रस्ताव आ राजनीतिक आ संवैधानिक संशोधन प्रस्ताव पर चर्चा भेल।
बैसारक बाद मीडियाकेँ सम्बोधित करैत राज्यसभा सांसद मनोज झा कहलनि जे पार्टी कतेको महत्वपूर्ण निर्णय लेने अछि। ओ जनतब देलनि जे रामचन्द्र पूर्वेकेँ पार्टीक संगठनात्मक चुनावक लेल मुख्य निर्वाचन अधिकारीक रूपमे नियुक्त कयल गेल अछि। ओ इहो उल्लेख कयलनि जे बैसारमे कतेको राजनीतिक प्रस्तावपर चर्चा कयल गेल।सांसद मनोज झा राजद अध्यक्ष लालू प्रसाद यादवक हवालासँ कहलनि कि “बिहारमे सत्ता परिवर्तनक समय आबि गेल अछि। पार्टी पूर्ण रूपसँ तैयार अछि आ बिहारक जनता परिवर्तनक मूडमे अछि। बिहारमे सत्ता परिवर्तन एहि साल होएत।”
सांसद मनोज झा उल्लेख कयलनि जे तेजस्वी एकटा स्पष्ट रेखा खींचने छथि। जेना, माई-बहिन मान योजना। बिहारमे कहियो एहेन कोनो योजना शुरू नहि कयल गेल अछि। एक बेर सरकार बनलाक बाद गरीब महिलासभकेँ हर मास २५०० रुपया, २०० यूनिट मुफ्त बिजली, आ सामाजिक सुरक्षा पेंशन योजनाक राशि चारि गुना भऽ जायत। तेजस्वी ओहि छात्र आ युवाक लेल एकटा खाका पर काज कऽ रहल छथि जे परीक्षाक तैयारी कऽ रहल छथि आ नौकरीक तलाशमे छथि। सबके जरूरतक ध्यान राखल जाएत। बिहारकेँ नव सरकारक आवश्यकता अछि, आ जतय धरि राहुल गाँधीक बात अछि, तेजस्वी यादव एहि होटलमे हुनकासँ भेंट कऽ चुकल छथि।
मुख्य प्रवक्ता शक्ति यादव बतौलनि जे बैसारमे ई निर्णय लेल गेल जे संस्थाकेँ आओर कोना सुदृढ़ कयल जाय। संगठनक चुनावसँ सम्बन्धित निर्णय लेल गेल अछि। पार्टीक संविधानमे संशोधन करबाक सभ अधिकार लालू आ तेजस्वीकेँ देल गेल अछि। लालू यादव आ तेजस्वीकेँ हर निर्णय लेबाक अधिकार देल गेल अछि। एहि दुनूक माध्यमसँ कयल गेल प्रत्येक निर्णय अन्तिम निर्णय होयत। तेजस्वीक नेतृत्वमे चुनाव लड़ैत ओ मुख्यमंत्री बनताह। ई तऽ अंडरस्टुड अछि। नीतीशकेँ संग लेबाक लेल कोनो चर्चा नहि भेल अछि। ई मुद्दा आब अछिये नहिं।
