दरभंगाक पतोर थाना क्षेत्रक रामभद्रपुर पंचायतक श्री दिलपुर मिडिल स्कूलमे महिला शिक्षिका संग दुर्व्यवहार करबाक आरोपी शिक्षका सुनील कुमार मेहरा आ प्रधानाध्यापक अमरनाथ झाकेँ जिला शिक्षा अधिकारी के.एन. सदा निलम्बित कऽ देलनि अछि। खबरि अछि जे आरोपी कतेको दिनसँ महिला शिक्षिकाक सङ्ग लगातार दुर्व्यवहार कऽ रहल छल। शिक्षिका प्रधानाध्यापकसँ बेर-बेर शिकायत करैत रहलीह, मुदा हस्तक्षेपक बादो शिक्षक अपन व्यवहार नहि बदललनि आ सोमदिन ओ विद्यालय परिसरमे फेरसँ महिला शिक्षिकाक सङ्ग दुर्व्यवहार कयलनि, जाहिसँ ओ अपन परिवारकेँ सूचित कयलनि आ डायल ११२ पर फोन कयलनि। डायल ११२ के आगमनसँ पहिने महिला शिक्षिकाक परिवार स्कूल पहुँचल आ आरोपी शिक्षककेँ भरपूर पीटलक। डायल ११२ सँ पुलिस बादमे पहुँचल आ पीटल शिक्षककेँ थाना लऽ गेल। मुदा, देर राति धरि कोनो दिससँ पुलिस स्टेशनमे कारवाईक लेल कोनो आवेदन दाखिल नहि कयल गेल अछि।
खबरि अछि जे जहिना घटनाक सूचना भेटल, आरोपी शिक्षक, आ प्रधानाध्यापककेँ देर साँझ जिला शिक्षा अधिकारीक कार्यालयसँ समन पठाओल गेल। ओतए एहि घटनाक पूरा जानकारी जुटा लेल गेल। डीईओ के देल गेल जानकारीक अनुसार आरोपी शिक्षक लगातार परेशान करैत छल। १० जनवरीकेँ छेड़खानी सेहो भेल छल, जकर शिकायत पीड़ित शिक्षक प्रधानाध्यापक अमरनाथ झासँ कयने छलाह, मुदा कोनो कारवाई नहि कयल गेल, तकर बाद सोमदिन छेड़खानीक एकटा आओर घटना भेल। स्कूल प्रबंधन द्वारा कोनो कारवाई नहि कयल गेल तऽ ओ ११२ डायल कऽ पुलिसकेँ बजौलनि। ई सभ मामिला सुनलाक बाद डीईओ के. एन. सदा तीनू शिक्षककेँ फटकार लगओलनि आ मामिला खत्म करबाक निर्देश देलनि। मुदा, मामला नहि सुलझलाक बाद प्राचार्य अमरनाथ झाकेँ प्रशासनिक अक्षमताक आरोपमे निलम्बित कऽ देल गेल। एम्हर आरोपी शिक्षक सुनील कुमार मेहरा के सेहो निलंबित कऽ देल गेल अछि।
दरभंगाक डीईओ के.एन. सदा बतौलनि जे जहिना मामिलाक सूचना भेटल, देर साँझमे प्रधानाध्यापक आ तीनू शिक्षककेँ बजाओल गेल। एहि मामिलाक संबंधमे तीनू गोटेसँ सूचना एकत्रित कयल गेल। एकर बाद आरोपी शिक्षककेँ निलम्बित कऽ देल गेल अछि, जखन कि प्रशासनिक अक्षमताक कारण विद्यालयक प्रधानाध्यापककेँ सेहो निलम्बित कऽ देल गेल अछि। एम्हर पतोर थानाक प्रमुख शिवनारायण कुमार कहलनि जे डायल ११२ सँ आरोपी शिक्षककेँ पुलिस स्टेशन अनलक अछि, मुदा महिला शिक्षिकासँ कोनो आवेदन नहि भेटल अछि। आवेदन भेटलाक बाद उचित कारवाई कयल जायत।
