बीपीएससी ७०म पीटी परीक्षा १३ दिसम्बरकेँ बिहारक विभिन्न परीक्षा केन्द्रपर आयोजित कयल गेल छल। परीक्षाक दिनसँ परीक्षार्थी परीक्षामे अनियमितताक आरोप लगा रहल छथि आ एकरा रद्द कऽ फेरसँ परीक्षा देबाक माँग कऽ रहल छथि। ई प्रदर्शन पिछला लगभग २५ दिनसँ चलि रहल अछि। जन सूरज पार्टीक कार्यकारी अध्यक्ष मनोज भारतीक नेतृत्वमे बीपीएससीक उम्मीदवारक एकटा प्रतिनिधिमण्डल राज्यपाल आरिफ मोहम्मद खानसँ भेंट करबाक लेल पटना राजभवन पहुँचल।
बिहार लोक सेवा आयोग शनि दिन खान ग्लोबलक पाँचटा केंद्रकेँ नोटिस पठौने छल। किछु दिन पहिने खान सर आयोग पर हमला कयने छलथि। खान सर आयोग पर सीट बेचबाक आरोप लगओने छलाह आ संगहिसंग आयोगक अधिकारीकेँ चोर, चोट्टा आर अपशब्द सभ कहने छलथि, जकर बाद दिल्लीक मुखर्जी नगर, करोल बाग, पटनाक बोरिंग रोड आ मुसल्लपुर हाट आ प्रयागराज केन्द्रकेँ नोटिस पठाओल गेल अछि।
एकर बाद खान सर प्रतिक्रिया दैत बीपीएससी केर चेयरमैनकेँ हटयबाक माँग कयलनि अछि। ओ कहलनि, “बीपीएससीमे किछु लोकक घुसपैठ भेल अछि जे जानिबूझि कऽ राज्य सरकारक छवि खराब कऽ रहल अछि। बीपीएससी अध्यक्षकेँ हटा देल जेबाक चाही।
बिहार लोक सेवा आयोग शनिदिन कहलक जे ओ राजनेता सहित कतेको व्यक्तिकेँ कानूनी नोटिस जारी कयलक अछि जे १३ दिसम्बरकेँ राज्यभरिमे आयोजित संयुक्त प्रतियोगी परीक्षा (सीसीई)क विवादमे आयोगक विरुद्ध अप्रमाणित आरोप लगओने छथि।
बीएसपीसीक परीक्षा नियंत्रक राजेश कुमार सिंह कहलनि, “आयोग राजनेता, कोचिंग सेंटरसँ जुड़ल किछु लोक सहित कतेको व्यक्तिकेँ नोटिस पठौलक अछि, जे बीपीएससी पर आधारहीन आरोप लगओने छथि, शेष नोटिस जल्दिये भेजल जाएत।”
यद्यपि परीक्षा नियंत्रक नोटिस भेजनिहारक नामक खुलासा नहि कयलनि, मुदा जन सूरज पार्टीक उपाध्यक्ष वाई.वी. गिरि पुष्टि कयलनि जे नोटिस प्राप्त करयवलामे पार्टीक संस्थापक प्रशांत किशोर सेहो छथि।
