जन सुराज पार्टीक संस्थापक आ पूर्व राजनीतिक रणनीतिकार प्रशांत किशोर बीपीएससी परीक्षा रद्द करबाक माँगक लेल अपन ‘आमरण अनशन’ जारी रखबाक घोषणा कयलनि। तकर समर्थनमे काल्हि ई विरोध प्रदर्शन भेल।
निर्दलीय सांसद राजेश रंजन उर्फ पप्पू यादवक समर्थक बिहार लोक सेवा आयोग (बीपीएससी) परीक्षाकेँ रद्द आ फेरसँ परीक्षाक मांग करैत रविदिन (12 जनवरी) पटनामे विरोध प्रदर्शन कयलथि। विरोध प्रदर्शनक हिस्साक रूपमे यादव ‘बिहार बंद’क आह्वान कयलनि जाहिसँ यातायात बाधित भेल आ शहरक कतेको भागमे अराजकता पसरि गेल।
प्रदर्शनकारी लोकनि टायर जराओलनि, सड़क अवरुद्ध कऽ देलनि आ यातायात जाम उत्पन्न कयलनि, विशेष रूपसँ पटनाक कंकड़बाग आ अशोक राजपथ सन क्षेत्रमे।
बीपीएससी’क शीर्ष अधिकारीसभक पुतलामे आगि लगा देल गेल, आ प्रदर्शनकारी द्वारा बन्द लागू करबाक लेल गाड़ीसभकेँ रोकल गेल। एहि स्थितिक कारण यात्रीसभकेँ भारी असुविधा भेल, जाहिमे वाहन घंटो धरि फँसल रहल।
व्यवधानक बावजूद, पुलिस डाक बंगलो क्रॉसिंगकेँ बंदमुक्त करबामे सफल रहल, सामान्य स्थिति बहाल करबाक लेल कतेको बन्द समर्थककेँ हिरासतमे लेल गेल। प्रशासनक हस्तक्षेपक बाद यातायातक आवाजाही धीरे-धीरे सामान्य भऽ गेल।
पूर्णियाक निर्दलीय सांसद पप्पू यादव पछिला साल १३ दिसम्बरकेँ आयोजित संयुक्त प्रतियोगी परीक्षामे कथित अनियमितताक विरोध करैत बीपीएससी अभ्यर्थीक समर्थनमे बन्दक आयोजन कयलनि। यादव दावा कयलनि जे बन्दकेँ आजाद समाज पार्टीक नेता चन्द्रशेखर आजादक समर्थन सेहो प्राप्त अछि।
जन सुराज पार्टीक संस्थापक आ पूर्व राजनीतिक रणनीतिकार प्रशांत किशोर बीपीएससी परीक्षा रद्द करबाक माँगक लेल अपन ‘आमरण अनशन’ जारी रखबाक बाद ई विरोध प्रदर्शन भेल अछि। किशोर, जिनका स्वास्थ्यक कारणेँ शनिदिन (११ जनवरी) अस्पतालमे भर्ती कयल गेल छल, छुट्टी भेटलाक बाद अपन अनशन फेरसँ शुरू कऽ देलनि अछि।
पटनाक जिलाधिकारी चन्द्रशेखर सिंह कहलनि जे वाहनक सुचारू आवाजाही सुनिश्चित करबाक लेल शहरक अलग-अलग स्थानपर पर्याप्त सुरक्षाकर्मी तैनात कयल गेल अछि। स्थिति पूर्ण रूपसँ नियंत्रणमे अछि।
जनतब दी जे एही बंद केर असर बिहार केर पटनाक अलावा मधेपुर आ पूर्णियामे देखल गेल। बिहार केर अन्य जिलाक मुख्यालयमे यादव केर समर्थक किछु देर तक उपस्थित रहि बंद केर समर्थनमे रोड पर छल मुदा बंद केर असर किछु खास नहि रहल आओर रविदिन हेबाक कारने सड़क पर आवाजाही ओहिना कम छल।
