हालहिमे ओडिशाक राज्यपालक पदसँ इस्तीफा देनिहार रघुबर दास औपचारिक रूपसँ सक्रिय राजनीतिमे अपन दोसर पारी शुरू कऽ देलनि अछि। ओ शुक्रदिन रांचीमे हजारो समर्थक आ पार्टीक राज्य इकाईक प्रमुख नेताक उपस्थितिमे भारतीय जनता पार्टी (भाजपा) मे शामिल भऽ गेलाह। एहि अवसर पर हुनक समर्थक भयंकर आतिशबाजी कयलक।
ओ कहलनि, “भारतीय जनता पार्टीक कार्यकर्ताक रूपमे हमरा लगैत अछि जेना हम अपन मायक आंचलक छांवमे घुरि आयल छी। राज्यपाल होयब गरिमाक विषय अछि आ भाजपा सन पार्टीक सङ्गठनक ‘दास’ बनब गर्वक विषय अछि। हम पार्टीमे सेवकक रूपमे आयल छी आ अन्तिम साँस धरि एकर सेवा करैत रहब।”
रघुबर दास कहलनि जे आजुक दिन हमरा लेल ऐतिहासिक अछि। हम १९८० के बाद दोसर बेर पार्टीमे शामिल भऽ रहल छी। २६ अक्टूबर २०२३ केँ राज्यपालक रूपमे नियुक्तिक अधिसूचना जारी भेलाक बाद जखनि पार्टीक राष्ट्रीय अध्यक्ष जेपी नड्डा जीकेँ इस्तीफा सौंपने छलौंह, तऽ ओ हमरा लेल बहुत भावुक क्षण छल। एकटा गरीब परिवारक बेटाकेँ जतेक मान-सम्मान भेटल, ओ मात्र भारतीय जनता पार्टीमे सम्भव अछि।
झारखण्डक पूर्व मुख्यमंत्री रघुबर दास कहलनि जे हालमे भेल विधानसभा चुनावक परिणाम हमर पार्टीक लेल अनुकूल नहि रहल अछि, मुदा हमरासभकेँ एहिसँ निराश नहि हेबाक चाही। चुनावमे जीत-हार होइत अछि। हम अपन पार्टीक विचार आ लक्ष्यक अनुसार काज करैत रहब। “हमसभ जल्दिये वापस आयब।”
राज्यमे नव गठबन्धन सरकारकेँ बधाई दैत ओ कहलनि, “अहाँकेँ जनादेश भेटल अछि, तेँ हम एकर स्वागत करैत छी।” आशा अछि जे ई सरकार अपन वादा पूरा करत। हम एहि सरकारकेँ समय देब, मुदा जँ ओ लोकक संग विश्वासघात करत, तऽ हम सड़कसँ सदन तक संघर्ष करब।
रघुबर दास पुनः पार्टीमे शामिल होयबाक लेल प्रधानमंत्री नरेन्द्र मोदी, गृह मंत्री अमित शाह, पार्टी अध्यक्ष जेपी नड्डा आ प्रदेश अध्यक्ष बाबूलाल मराण्डीक प्रति आभार व्यक्त कयलनि। एहि अवसर पर रांची स्थित प्रदेश भाजपा कार्यालयमे आयोजित कार्यक्रममे प्रदेश भाजपा अध्यक्ष बाबूलाल मरांडी, केंद्रीय रक्षा राज्य मंत्री संजय सेठ, प्रदेश कार्यकारी अध्यक्ष रविन्द्र राय, क्षेत्रीय संगठन मंत्री नागेन्द्र जी, सांसद मनीष जायसवाल, कालीचरण सिंह, आदित्य साहू आ झारखंडक पूर्व विपक्षक नेता अमर बौरी सहित कतेको उपस्थित छलाह।
उल्लेखनीय अछि जे रघुबर दासक राजनीतिमे नव सक्रिय पारी एहेन समयमे शुरू भेल अछि जखनि भाजपा राज्यमे मजबूत नेतृत्वक विकल्पक मंथन कऽ रहल अछि। भाजपाक प्रदेश अध्यक्षक नाम फरवरीमे तय होबयवला अछि। अनुमान लगाओल जा रहल अछि जे रघुबर दासकेँ राज्य नेतृत्व सम्हारबाक लेल एक बेर फेर आगू राखल जा सकैत अछि। ओ पूर्व मे दू बेर झारखंड राज्य भाजपाक अध्यक्ष सेहो रहि चुकल छथि।
भाजपाक राष्ट्रीय उपाध्यक्षक रूपमे ओ सङ्गठनमे सेहो सक्रिय रहल छथि। हुनकर पहिचान राज्यमे पार्टीक सबसँ पैघ ओबीसी नेताक रूपमे भेल अछि। इहो चर्चा अछि जे पार्टी हुनका राष्ट्रीय स्तर पर संगठनमे पैघ जिम्मेदारी दऽ सकैत अछि।
