मधुबनीक मेयर अरुण राॅयकेँ सौंपल गेल ‘मैथिल पुनर्जागरण प्रकाश फोरम’क गतिविधिक ज्ञापन

‘मिथिलाक पहिचान मिथिलाक्षर निशान’ लेल भेटल आश्वासन आ अनुमति
*
मधुबनी समदिया
*

सामाजिक उत्थानक लेल ‘मैथिल पुनर्जागरण प्रकाश फोरम’क अनेक गतिविधि धरातल पर गतिशील अछि आ एहि हेतु काजक निष्पादन हेतु संपर्क अभियान ओ संबंधित व्यक्तित्व सभसँ भेटघांटक सिलसिला जारी अछि।

एहि क्रममे चारि सदस्यीय टीम बुधकेँ मधुबनी नगर निगम कार्यालयमे यशस्वी नगर मुख्य पार्षद (मेयर) अरुण राॅयसँ भेंट कय ‘मैथिल पुनर्जागरण प्रकाश फोरम’क गतिविधिक ज्ञापन सौंपलक। चारि सदस्यीय टीममे अजय नाथ झा शास्त्री, कुन्दन आनंद झा, प्रमोद कुमार झा एवं संजय कुमार झा सम्मिलित छलथि।

ज्ञापनमे मुख्य रुपसँ ‘मिथिलाक पहिचान मिथिलाक्षर निशान’ अभियानक लेल नगर क्षेत्रमे सार्वजनिक बोर्ड, स्थान आदिमे नाम आ जानकारी आदि मिथिलाक्षरमे सेहो अंकित होय, तकर अनुमति एवं एहि लेल समुचित व्यवस्था आदिक उल्लेख छल। जाहि लेल मेयर अरुण राॅय सहर्ष आश्वासन प्रदान करैत आगूक कार्योजनाक प्रारूपक लेल शिघ्र एकटा बैसार करय केर सहमति देलनि। संगहि संग मधुबनीसँ प्रकाशित राष्ट्रीय मैथिली दैनिक ‘मैथिल पुनर्जागरण प्रकाश’ पर सेहो चर्चा भेल। चर्चाक दौरान संयोगवश ओतय मधुबनीक कांग्रेस जिलाध्यक्ष मनोज झा सेहो उपस्थित छलाह। हुनकर सकारात्मक विचार सेहो उत्साहित करयवाला छल।

जनतब जे मेयर अरुण राॅयक अपन माटिक भाषा मैथिलीसँ स्नेहक चर्चा हुनका द्वारा कयल गेल नगर निगम क्षेत्रक प्रवेश द्वार आदि पर मैथिलीमे लेखन आदिक लेल लोकमे अछि।

दोसर दिसि फोरमक जारी ‘पुनर्जागरण शिक्षण-प्रशिक्षण’ जनसंपर्क अभियानक अंतर्गत बुधकेँ एकटा चारि सदस्यीय दल ‘सुशीला शिक्षण संस्थान’मे प्राचार्य आनंद झासँ भेंट कयलक आ नि: शुल्क बेसिक काॅम्प्यूटर DCA एवं टाइपिंग (देवनागरी/अंग्रेजी) छः मासक सर्टिफिकेट कोर्सक कार्ययोजनाक बारेमे जानकारी देलक, जाहि लेल विवेकशील प्राचार्य आनंद झा मार्गदर्शन करैत पूर्ण सहयोग एवं समर्थनक आश्वासन देलनि।