घटना स्टेट बैंकक कर्मचारीक शव संदिग्ध स्थितिमे भेटल, पुलिस गुत्थी सुलझाबमे लागल January 3, 2025 Maithil Punarjagran Prakash सीतामढ़ी समदिया * सीतामढ़ीमे एकटा बैंक कर्मचारीक शव संदिग्ध स्थितिमे भेटल अछि। ई घटना जिलाक बैरगनिया थाना क्षेत्रक बैरगनिया बजारक अछि। हुनकर शव एकटा कमरामे लटकल भेटल। मृतकक पहिचान जिलाक पुपरीक निवासी गोनू आनन्दक रूपमे भेल अछि जे किरायाक घरमे रहैत छलाह। घटनाक सूचना भेटलाक बाद स्थानीय बैरगनिया थानाक पुलिस घटनास्थल पर पहुँचि मामिलाक जाँच कऽ रहल अछि। मृतकक परिजनकेँ एहि बारेमे जानकारी देल गेल अछि। सूचना भेटलाक बाद परिवार घटनास्थल दिसि निकलि गेल छलथि। प्राप्त जानकारीक अनुसार मृतक गोनू स्टेट बैंक बैरगनियामे क्लर्कक रूपमे काज करैत छलाह। सबदिन जकाँ ओ बैंकसँ अपन डेरा घुरि अयलाह। बृहस्पति दिन दुपहरमे हुनकर शव बरामद भेल। भोर ११ बजे धरि जखनि गेट नहि खुजल तखनि लोकसभकेँ सन्देह भऽ गेल, ओकर बाद पता चलल जे हुनकर शव छतसँ लटकल अछि। पुलिस शवकेँ कब्जामे लऽ कऽ पोस्टमार्टम लेल पठा रहल छल। संगहि ओ परिवारक आबय केर प्रतीक्षा कऽ रहल छल। थानाध्यक्ष कहलनि जे प्रथम दृष्टया ई मामिला आत्महत्याक प्रतीत होइत अछि। खैर, परिवार आब आबि रहल अछि। हुनका सभसँ गप्प भेलाक बादे मामिला स्पष्ट होयत। फिलहाल, अगल-बगलमे पूछताछ चलि रहल अछि। Spread the love
