आम आदमी पार्टीक राष्ट्रीय संयोजक अरविन्द केजरीवाल दिल्ली विधानसभा चुनावसँ ठीक पहिने एकटा आओर पैघ घोषणा कयलनि अछि। एहि घोषणामे ओ दिल्लीक पुजारी, गुरुद्वारामे ग्रन्थिक देखभाल करयवाला, हिनका सभकेँ प्रत्येक मास १८००० रुपैया देबाक घोषणा कयलनि अछि।
“पुजारी ग्रंथ सम्मान योजना”क शुभारंभ करैत अरविन्द केजरीवाल कहलनि जे भाजपा हमरा द्वारा कयल गेल प्रत्येक घोषणाकेँ रोकबाक प्रयास कयलक अछि। जँ ओ लोकनि एकरा सेहो रोकबाक प्रयास करैत छथि तँ हुनका बहुत पाप लागत। ओ कहलनि जे ओ ३१ दिसम्बरकेँ कनॉट प्लेसक हनुमान मन्दिर जाय ओतय केर पुजारीक पंजीकरण शुरू करताह।
एहि योजनाक घोषणा करैत अरविन्द केजरीवाल कहलनि जे ई योजना ओहि लोकक लेल अछि जिनकर समाजमे सबसँ बेसी योगदान अछि, मुदा आइ धरि समाज ओहि पर ध्यान नहिं देलक अछि। कोनो दल या कोनो सरकार हुनका सभ पर कोनो ध्यान नहि देलक। ओ कहलखिन जे चाहे खुशीक अवसर होय वा दुःखक। चाहे घरमे बियाह होय वा बच्चाक जन्मदिन होय वा ककरो मृत्यु भऽ जाय, पुजारी हरदम हमरासभक सङ्ग ठाढ़ रहैत छथि। ओ कहलनि जे पुजारी पीढ़ी-दर-पीढ़ी हमर परम्पराकेँ आगू बढ़ौलनि अछि। मुदा ओ कहियो अपन परिवार पर ध्यान नहि देलनि आ हम सभ सेहो हुनका दिसि ध्यान नहि देलहुँ। हम सभ पूजा-पाठ करय लेल मन्दिर जाइत छी, मुदा कहियो हुनका पर ध्यान नहि दैत छी।
अरविन्द केजरीवाल अपन घोषणामे कहलनि अछि जे हम एकरा वेतन नहिं कहब, हम एकरा हुनकर सम्मान कहब आ एकर तहत हर महीना पुजारी आ ग्रंथि सभकेँ लगभग १८००० रुपया देल जायत। एकर पंजीकरण काल्हिसँ शुरू होयत, जे हम कनॉट प्लेस स्थित हनुमान मन्दिरमे पुजारी लग जा कऽ अपन उपस्थितिमे करब आ चुनावक बाद हमर सरकार सत्तामे अबैत ई योजना लागू कयल जायत।
