एहिमे पुलिस अधीक्षक हिमांशुक निर्देशन आ ट्रैफिक डीएसपी प्रवीण कुमारक नेतृत्वमे सदर एसडीपीओ आलोक कुमार, साइबर डीएसपी अजीत कुमार, डीटीओ संजीव चौधरी, उप मेयर उमर हयात गुड्डू, नगर आयुक्त अनुभूति श्रीवास्तव, पुलिसकर्मी, नगर निगम एवं मीडिया कर्मी उपस्थित रहलाह।अभियानक शुरुवातमे बाइक रैलीमे भाग लेनीहार लोक लेल टी शर्ट देल गेल जाहिमे ट्रैफिक थाना आ जिला परिवहन विभागसँ एकटा सूचना रुपमे जागरूकता अभियान छपल छल, ओकरा पहिरने एकटा जागरूकता रैलीक माध्यमसँ जिलाक सब दुपहिया चालककेँ लेल 100% हेलमेट उपयोगक आ ओकर लाभक जानकारी देल गेल।
जागरूकताक संबंधमे ट्रैफिक डीएसपी प्रवीण कुमार कहलनि जे, एहि रैलीक उद्देश्य ई सुनिश्चित करब अछि जे सहरसा जिला कए सब बाइक सवार हेलमेटक उपयोग करथि। ओ कहला जे 31 दिसंबर तक हुनकर लक्ष्य अछि जे जिलाक सब बाइक सवारकेँ शत-प्रतिशत हेलमेट पहिरब शुरु कऽ देबाक चाही। ओ इहो कहलनि जे, किछु दिन पहिने तक करीब 50 प्रतिशत लोक हेलमेट पहिरैत छलाह। मुदा आब ई संख्या बढ़ि कए करीब 80 प्रतिशत भऽ गेल अछि आ बाकी लोकसँ अपील कयलनि जे ओ हेलमेट पहिरबाक आदत बनाबथि ताकि हम सब मिल कए सड़क सुरक्षा सुनिश्चित कय सकब आ सभक जान बचा सकब।
डीएसपी प्रवीण कुमार इहो कहलनि जे, हालक अतीतमे हेलमेट पहिरबाक आदतिमे सकारात्मक परिवर्तन आयल अछि आ एहिसँ सड़क सुरक्षामे सुधार भेल अछि आ रैलीमे भाग लेनिहार आम लोककेँ धन्यवाद देलनि। ट्रैफिक डीएसपी श्री कुमार कहलनि जे, शहरक यातायात प्रणालीमे सुधारक लेल ई-रिक्शाक संचालन लेल मार्गक तीन भागमे बांटल गेल अछि आ मार्ग तय कयल गेल अछि। ओ कहलनि जे, सब मुख्य चौराहा पर हेलमेट चेकिंग लेल ट्रैफिक पुलिसकेँ अलर्ट कयल गेल अछि। एहेनमे ओ अपील कयलनि जे बिना हेलमेटक कहियो मोटरसाइकिल नहि चलाउ। ओ कहलनि जे एहि लेल लोक केर पहिने गुलाबक फूल दऽ कऽ आग्रह आ जागरूक कयल गेल अछि।
आब ट्रैफिक पुलिस बिना हेलमेटक ड्राइवरकेँ चालान जारी करत। एहि अवसर पर उपस्थित लोक ट्रैफिक पुलिसक सराहना करैत जाममे कमी पर खुशी व्यक्त करैत एहि तरहक वाहन जांच नियमित रूपसँ करबाक मांग कयलथि।
