आम आदमी पार्टीक राष्ट्रीय संयोजक अरविन्द केजरीवाल शनिदिन भाजपा पर आरोप लगओलनि जे ओ महिलासभकेँ प्रति महिना २,१०० रुपया देब आ बुजुर्गक मुफ्त इलाज जेहन योजना सभकेँ रोकबाक प्रयास कऽ रहल अछि।
दिल्लीक पूर्व मुख्यमंत्री अरविन्द केजरीवाल एहि योजनासभक जाञ्चक आदेशपर सवाल उठबैत पूछलनि जे एहिमे की जाँच कयल जायत। ई हमर चुनावी घोषणा अछि, जकरा ओ जांचक नाम पर रोकय चाहैत छथि। केजरीवालक कहब छनि जे भाजपा एहि डेगसँ अपन मंशा स्पष्ट कऽ देलक अछि। ओ आरोप लगओलनि जे भाजपा दिल्लीक लोककेँ देल जा रहल सुविधाकेँ रोकय चाहैत अछि।
केजरीवाल कहलनि जे भाजपा आ कांग्रेस मिलिकऽ आम आदमी पार्टीकेँ रोकबाक प्रयास कऽ रहल अछि। जखनि भाजपा हिम्मत नहिं कयलक तखनि भाजपा कांग्रेसक संदीप दीक्षित द्वारा उपराज्यपालसँ शिकायत करबेलक। केजरीवाल कहलनि जे ओ एहि योजना सभकेँ नहि रुकय देताह आ कोनो परिस्थितिमे एकरा दिल्लीमे लागू करताह। ओ दिल्लीवासी सभसँ दुनू योजनाक अन्तर्गत अपन पंजीयन करबाबय लेल कहलनि।
दिल्लीक पूर्व मुख्यमंत्री अरविन्द केजरीवालक कहब छनि जे सरकार दूटा महत्वपूर्ण योजनाक घोषणा कयने छल। पहिल योजनाक अन्तर्गत महिलासभकेँ २,१०० रुपैया प्रति माह आ दोसर योजनामे बुजुर्गकेँ निःशुल्क उपचार देल जायत। दिल्लीमे लाखो लोक मात्र किछु दिनमे एहि योजनासभक लेल पंजीकरण कयने छथि, जाहिसँ भाजपा बहुत घबरा गेल अछि।
केजरीवाल कहलनि जे दिल्लीमे भाजपाक एकमात्र उद्देश्य अछि – महिला सम्मान योजनाकेँ दिल्लीमे लागू नहि होबय देब। सरकारकेँ एहि योजनाक तहत महिलाकेँ २,१०० रुपया प्रति माह देल जेबाक अछि। केजरीवाल कहलनि जे जँ ओ भाजपाकेँ वोट देलनि तँ भाजपा महिलासभक लेल मुफ्त बस यात्रा सन सुविधा बन्द कऽ देत। मुफ्त बिजली आ मुफ्त पानि बंद कए देल जाएत। भाजपा दिल्लीमे संजीवनी योजनाकेँ सेहो लागू करबाक अनुमति नहि देत, जकर उद्देश्य बुजुर्गकेँ मुफ्त उपचार प्रदान करब अछि।
केजरीवाल कहलनि जे भेंटक दौरान कतेको लोक हुनका कहलनि जे मुफ्त बिजली, पानि, स्कूल, स्वास्थ्य सन सुविधाक कारण कम वेतनक बादो ओ दिल्लीमे टिकल रहबामे सक्षम छथि। ओ कहलखिन, “हम दिल्लीवासी सभसँ कहय चाहैत छी जे जँ ओ दिल्लीमे भाजपाकेँ वोट दैत छथि तँ ओ मुफ्त बिजली, पानि, स्वास्थ्य, मुफ्त शिक्षा जेहन व्यवस्था बन्द कऽ देत, जाहि कारणेँ गरीब लोककेँ दिल्ली छोड़य पड़त।”
केजरीवाल कहलनि जे जखनि ओ दिल्लीमे नीक सरकारी स्कूल बना रहल छलाह तखनि ओहि समय सेहो बाधा छल, मुदा ओ सभ एकरा लेल लड़लाह आ स्कूल बनौलनि। मुफ्त बिजली, मुफ्त पानि आ मुफ्त बस यात्राक क्रममे सेहो एहने व्यवधान आयल छल, मुदा ई सब लागू कयल गेल। तहिना ओ महिलासभकेँ प्रति माह २,१०० रुपया आ बुजुर्गकेँ निःशुल्क स्वास्थ्य देबयवला योजना सेहो लागू करत।
