मैथिल पुनर्जागरण प्रकाश (राष्ट्रीय मैथिली दैनिक) केर चारिम स्थापना दिवस काल्हि २६ दिसंबर २०२४ केँ मधुबनीमे समारोह पूर्वक मनाओल गेल। एहि अवसर पर स्थानीय विशिष्ट व्यक्तित्व जूटल छलथि , संगहि संग ऑनलाइन देश-दुनियाक कतेको विशिष्ट व्यक्तित्व जुड़लथि। समारोह प्रधान संपादक अजय नाथ झा शास्त्री केर स्वागत-आभार ओ धन्यवाद भाषणसँ शुरू भेल। शास्त्री अखबार प्रकाशनमे कोनो रुपें जुड़ल समस्त मिथिलावासीकेँ धन्यवाद एवं अभिनन्दन कयलनि।
एहि अवसर पर अखबार प्रकाशनमे सतत सक्रिय योगदानक लेल ‘उत्कृष्ट सक्रिय प्रदर्शन सम्मान’ प्रदान कयल गेल। जनतब जे पहिल अंकक प्रकाशन २६ दिसम्बर २०२१ कऽ भेल छल।
जिनका सभकेँ एही सम्मान सम्मानित कायल गेल ताहिमे धर्मेन्द्र कुमार झा (प्रबंध संपादक), संजय कुमार झा (व्यवस्थापक), राकेश कुमार दास (डिजाइनर), सीए श्याम कुमार (वित्तीय लीगल सलाहकार), कुन्दन आनंद झा (लेखा विभाग), शोभा झा (संपादन सहयोग), प्रवीण कुमार झा (संपादन सहयोग), एडवोकेट कन्हैयाजी (लीगल सलाहकार), ओम प्रकाश (डिजाइनर), एस कर्ण (ऑपरेटर), देवेन्द्र झा (पत्रकार), गणपति मिश्र (पत्रकार), सुभाष चन्द्र झा (पत्रकार), कृष्ण कान्त झा (प्रसार), मनीष मिश्रा (वेबसाइट टीम प्रमुख), ठाकुर पार्थ (वेबसाइट ऑपरेटर) के नाम छल। जे कियो नहिं उपस्थित भऽ सकलाह तिनका सम्मान हुनका तक प्रतिनिधि द्वारा पहुँचायल जायत।
एही कार्यक्रममे चारिम वर्षमे प्रवेश भेलाक उपरांत मैथिल पुनर्जागरण प्रकाशक कार्य करवाक दिशामे विस्तृत विचार-विमर्श भेल। जाहिमे सभ कियो अपन-अपन मंतव्य रखलाह। मैथिल पुनर्जागरण प्रकाश निःशुल्क शिक्षा केर क्षेत्रमे मिथिलाक्षर साक्षरता अभियानक माध्यमसँ बहुत पहिनेसँ कार्य कऽ रहल अछि। एहीसँ एक डेग आगू बढ़ी कऽ कंप्यूटर केर बेसिक शिक्षा आ टाइपिंग सेहो निःशुल्क प्रारम्भ होबय जा रहल अछि, तकर सेहो घोषणा भेल। बहुत जल्दी नामांकन लेल रजिस्ट्रेशन आ तकर बाद निरंतर क्लास आरम्भ होयत। ई सभ उपक्रम आब ‘मैथिल पुनर्जागरण प्रकाश फोरम’ रजिस्टर्ड संस्थानक तरफसँ आब इकट्ठा होएत संगहि संग, पत्रकारिता प्रशिक्षण एवं सहकारिता आदि अनेक मिथिला-मैथिलीक उपक्रम सेहो क्रमशः शुरू होएत, एकर घोषणा सेहो भेल।
मैथिल समाचार पत्रख प्रकाशन अनवरत होयत रहय ताहि लेल सबके सहयोग आ मैथिलीमे पठन-पाठन पर सभक जोर छल। सभ उपस्थित गणमान्य एही केर माध्यमसँ मैथिली भाषाक संरक्षण आ संवर्धन संग मिथिलाक्षेत्र मे मुख्य धारामे स्थानीय भाषा बनल रहय ताहि लेल अपन-अपन प्रतिबद्धता जतौलनि।
उपस्थित जनमे शोभ नाथ झा, प्रेम नाथ झा, अजय नाथ झा शास्त्री, डाॅ ब्रह्मानंद झा, इन्द्रदेव चौधरी (सरिसव पाही), प्रमोद कुमार झा (कोइलख), शुभाष चन्द्र झा (सहरसा), गोपाल कुमार झा, राकेश कुमार दास, संजय कुमार झा, कुन्दन आनंद झा आदि उपस्थित छलथि। ऑनलाइन कृष्ण कान्त झा, देवेन्द्र झा, कुमार प्रमोद चन्द्र, शोभा झा, ओमप्रकाश झा, दीपक आनंद एवं अनेक मिथिलाक्षर साक्षरता अभियानी जुड़ल छलथि। सभगोटे मैथिली अखबारक सतत तीनसालक प्रकाशनक पहिल उपलब्धिक लेल शुभकामना व्यक्ति कयलनि आ अखंड रुपसँ सतत प्रकाशनक लेल संकल्पित भेलथि।
