मिथिलावादी पार्टीक कार्यकर्ता सभ जिला प्रभारी संजय झा आ प्रखंड अध्यक्ष जुगनू मंडलक नेतृत्वमे अपन १५ सुत्री मांग केर लऽकय घनश्यामपुर प्रखंड मुख्यालय प्रांगणमे बेमियादी भूख हड़ताल तेसरो दिन जारी रखलन्हि। अनशन पर बैसल एमएसयू केर जिला प्रभारी संजय झा आरोप लगेलनि जे प्रखंडस्तरीय विभिन्न मांग सभकेँ लऽ कय कतेको बेर बीडीओ सहित संबंधित अधिकारी सभकेँ आवेदन देल गेल मुदा कोनो कारवाई नहि कयल गेल। नतीजन भूख हड़ताल पर बैसय पड़ल।
आगा ओ बतेलनि जे हम सभ प्रशासनकें ई बता देबय चाहैत छी जे मिथिलावादी पार्टी ककरोसँ समझौता करयवला पार्टी नहि अछि। ओतहि पार्टी केर प्रखंड अध्यक्ष जुगनू मंडल कहलनि जे घनश्यामपुर प्रखंड मुख्यालय भ्रष्टाचारक अड्डा बनि गेल अछि। नगर पंचायत घनश्यामपुरमे वर्षहुसँ बन्द पड़ल आरटीपीएस काउंटर संग एतय सभ छोट पैघ काजसँ लऽ कय योजना सबहक संचालनमे लूट-खसोट आ सरकारी टाकाक बंदरबांट कयल जा रहल अछि। हमर मुख्य मांगमे सभ बंद पड़ल आरटीपीएस काउंटर चालू करेनाई, बंद पड़ल स्वास्थ्य उप केंद्रकेँ चालू करेनाई , पीडीएस केर व्यवस्था भ्रष्टाचार मुक्त करेनाई , थाना क्षेत्रमे बढ़ि रहल चोरी चकारीकेँ रोकबाक, प्रखंडमे आईटीआई कालेज खोलबाक आदि शामिल अछि।
धरना स्थल पर चंदन यादव , नवीन सहनी , चंदन झा , मो० सदरे आलम , मो० कलाम, मो० निराले केर संग संग प्रखंड क्षेत्रक मिथिलावादी पार्टीक समर्थक आ कार्यकर्ता मौजूद छलाह।
