बरखा बढ़ोलक ठिठुरन, बिहारक २४ जिलामे आइ बुधकेँ कुहेसक येलो अलर्ट

पटना समदिया
*

बिहारक मौसममे बदलाव आबि रहल अछि। पाँच जिलामे बरखाक कारण जाड़क प्रकोप बढ़ि गेल अछि।. बिहारमे न्यूनतम तापमानमे लगातार गिरावट आबि रहल अछि। मौसम विभागक अनुसार, एहि सप्ताहसँ जाड़ आओर बढ़बाक सम्भावना अछि। आइ बुधकेँ बिहारक २४ जिलामे घना कुहेस रहत, मौसम विभाग राज्यक कतेको जिलामे येलो अलर्ट जारी कयलक अछि।

मुदा, एखनि धरि शीतलहरक लेल कोनो चेतावनी नहि अछि। आइ बुधकेँ गोपालगंज, सीवान, सारण एवं मिथिला क्षेत्रीय बिहारक अधिकार जिलामे घना कुहेस रहत। एहिमे पश्चिमी चंपारण, पूर्वी चंपारण, सीतामढ़ी, शिवहर, मुजफ्फरपुर, वैशाली, दरभंगा, समस्तीपुर, मधुबनी, सुपौल, मधेपुरा, किशनगंज, अररिया, सहरसा, पूर्णिया, कटिहार, भागलपुर, खगड़िया, बांका, जमुई आ मुंगेर जिला शामिल अछि।

मौसम विभागक कहब अछि जे पछुआ आ पूरवा हवाक मिलनक कारण ई स्थिति अगिला दू दिन धरि बनल रहत। राज्यमे पश्चिमी विक्षोभ दस्तक देबय बला अछि। पटनामे मौसम विभागक वैज्ञानिकक अनुसार, अगिला २४ घंटामे राज्यक न्यूनतम तापमानमे आओर गिरावट आबि सकैत अछि। तापमानमे गिरावट २ सँ ४ डिग्री सेल्सियस धरि भऽ सकैत अछि। मंगलदिन भोरे पटना सहित १५ जिलामे घना कुहेस छल, किछु जिलामे हल्लुक बरखा सेहो भेल। मुदा, जेना-जेना दिन बढ़ैत गेल, मौसम साफ भऽ गेल। अगिला दू दिनमे हवाक तेज गतिक कारण दिन आ रातिक तापमानमे तेजीसँ गिरावट आबि जायत। पूरा बिहारमे तापमानमे दूसँ तीन डिग्री सेल्सियसक गिरावट आबि सकैत अछि। जल्दिये कंपकंपी छुड़ाव वाला ठंढा पड़य केर संभावना अछि।