दरभंगा-मुजफ्फरपुर उच्च पथ पर भराठी कृषि फार्म लग बस आ ट्रैक्टरमे भेल जोरदार टक्करमे एक दर्जनसँ बेसी लोक जख्मी भऽ इलाजरत छथि। टक्करक जोरदार आवाजसँ घटनास्थलक आसपासमे अफरा-तफरी मचि गेल। घटनास्थल पर बहुत बेसी लोक जमा भऽ गेलाह। लोकक भीड़क कारणे लगभग आधा घंटाधरि मुजफ्फरपुर जायवला लेन पर आवागमन बाधित रहल।
घटनास्थल पर पहुंचल सिमरी थाना पुलिस मशक्कत कऽ कऽ आवागमनकेँ चालू करौलनि। बताओल जा रहल अछि जे ट्रैक्टर मुजफ्फरपुर दिसि जा रहल छल। पाछुसँ तेज रफ्तारमे आबि रहल बस चालकक बस परसँ संतुलन बिगड़ि गेल आ बस ट्रैक्टरकेँ पाछूसँ जोरदार ठोकर मारि देलक। ठोकर मारलाक बाद बस सड़कसँ लगभग दस फीट नीचा एकटा खदहाइरमे गुड़कि गेल जखनकि ट्रैक्टर सड़के पर अत्यधिक क्षतिग्रस्त भऽ गेल। घटनास्थल पर पहुंचल लोक सभ बसमे फंसल बस चालककेँ कोनो तरहे बससं बाहर निकाललनि । एहि घटनामे ट्रैक्टर आ बस चालक सहित एक दर्जनसँ बेसी लोक चोटिल भऽ गेलाह जिनका सबहक उपचार स्थानीय क्लिनिकमे भऽ रहल छनि।
रक्ष रहल जे कोनो हताहतक समाचार नहिं भेटल अछि।
