दरभंगा जिलाक कमतौल मुख्य मार्ग पर रघौली हाई स्कूलक समीप सड़क दुर्घटनामे एकटा २९ वर्षीय शिक्षकक मृत्यु भऽ गेल। मृतक काजी बहेरा पंचायतक एकटा मिडिल स्कूलमे शिक्षक छलथि। मृतकक पहिचान मिथिलेश कुमार मधुकरक रूपमे भेल अछि।
घटनाक सूचना भेटलाक बाद विस्फी थानाक पुलिस घटनास्थल पर पहुँचल। घटनास्थलसँ युवकक जेबीसँ दस्तावेज निकालि शवक पहिचान कयल गेल। ओकर बाद हुनकर परिवारकेँ जानकारी देल गेल। पुलिस शवकेँ कब्जामे लेलक अछि आ आगूक कारवाई शुरू कऽ देलक अछि।
परिवारक कहब अछि जे मृतक शिक्षक मिथिलेश कुमार मधुकर अपन दूटा आन भायक संग दरभंगाक दोनार गुमटी लग रहैत छलाह। रोज भोर ५ सँ ५:३० बजेक बीच ओ दरभंगा सँ काजी बहेरा मिडिल स्कूल लेल निकलैत छलाह। ओ बीपीएससी पास कयलनि आ पछिला साल शिक्षक बनल छलाह। ओ एखनहु अविवाहित छलाह। विस्फी थानाक प्रभारी अविनाश कुमार कहलनि जे ई घटना भोरे लगभग ६:३० बजे भेल। बाइक पर सवार शिक्षकक मौकापर मृत्यु भऽ गेलन। ओ दरभंगासँ स्कूल जा रहल छलाह तखनि एकटा अज्ञात वाहन हुनका कुचलि देलक। पुलिस मामीलाक जांच कs रहल अछि।
