बिजली विभाग उपभोक्ता लेल एकटा विशेष योजना लऽ कऽ आयल अछि। आब जँ कोनो स्मार्ट प्रीपेड मीटर खाताक बैलेंस २००० रुपया या ओहिसँ बेसी छह माससँ बेसी अछि तँ बैंक दरसँ ०.२५% बेसी ब्याज देल जायत। ग्रामीण क्षेत्रक पोस्टपेड उपभोक्ताकेँ चारिम मासमे १% छूट भेटत यदि ओ तीन मास धरि लगातार अपन बिजलीक बिलक भुगतान करैत छथि। एकर मतलब अछि जे जँ अहाँ तीन मासक लेल २००० रूपैयाक बिल भरने छी तँ चारिम मासक बिजलीक बिलमे कंपनी द्वारा २० रुपयाक छूट देल जायत।
साउथ बिहार पावर डिस्ट्रीब्यूशन कंपनीक अधिकारी लोकनि कहलनि जे ‘अप्रैलसँ जून आ जुलाईसँ सितम्बर धरि एहि योजनासँ सीधे ८०७,००० उपभोक्ताकेँ लाभ भेटल अछि।’एहि उपभोक्तासभकेँ कंपनी द्वारा २,५८,००० रुपैयाक छूट देल गेल अछि। तहिना उपभोक्ता सेहो ऑनलाइन माध्यमसँ समय पर बिजली बिलक भुगतान करबा पर ३.५ प्रतिशतक बचत करैत छथि।
प्राप्त जानकारीक अनुसार सौर पैनलसँ ग्रिडसँ जुड़ला पर हिसाब करबाक लेल अलग नेट मीटर लगयबाक आवश्यकता नहि अछि। बिजली कतेक दिन धरि भेटैत अछि एकर जानकारी सेहो लगातार उपलब्ध अछि। एहि स्थापनाक लेल कोनो अतिरिक्त शुल्क देबाक आवश्यकता नहि अछि। स्मार्ट प्रीपेड मीटरकेँ ऑनलाइन रिचार्ज करैत काल तीन प्रतिशत छूट सेहो उपलब्ध अछि। सोमदिन भेल बैसारक दौरान ऊर्जा सचिव पंकज कुमार पाल सभ अधिकारी आ एजेंसीकेँ निर्देश देलनि जे ओ लोकसभकेँ स्मार्ट प्रीपेड मीटरक लाभ आ तकनीकी विशेषताक जानकारी देथि। ओ सभ अधिकारीकेँ स्मार्ट प्रीपेड मीटरक संबंधमे लोकक बीच गलत धारणाकेँ दूर करबाक लेल आ ओकर लाभकेँ उजागर करबाक लेल जागरूकता अभियान चलयबाक निर्देश देलनि।
