भाजपा नेता विनोद तावड़े कांग्रेस नेता राहुल गांधी, कांग्रेस अध्यक्ष मल्लिकार्जुन खड़गे आ सुप्रिया श्रीनेतकेँ हुनका पर मतदाता सभकेँ प्रभावित करबाक लेल कथित रूपसँ पैसा बाँटबाक आरोप लगयबा लेल कानूनी नोटिस पठौलनि अछि। नोटिसमे तावड़े केर हवालासँ कहल गेल अछि जे एहि तीनू नेताकेँ २४ घंटाक भीतर हुनकासँ माफी मांगय केर चाही अन्यथा हुनका १०० करोड़ रुपयाक मानहानिक मुकदमाक सामना करय पड़त। भाजपा नेता विनोद तावड़े स्वयं एहि नोटिस केर बारेमे जानकारी देलनि अछि।
महाराष्ट्र विधानसभा चुनावक मतदानसँ किछु घंटा पहिने मंगलदिन बहुजन विकास अघाड़ी (बीवीए)क नेता हितेन्द्र ठाकुर विनोद तावड़े पर विरारक एकटा होटलमे ५ करोड़ टाका बाँटबाक आरोप लगओलनि। एहि आरोपक बाद कांग्रेस आ एनसीपी (सपा) सन विपक्षी दलक सङ्ग-सङ्ग शिवसेना उद्धव बालासाहेब ठाकरे हुनका पर कतेको आरोप आ बयानक बौछार कयलनि।
नोटिसमे तावड़े कहलनि कि हुनका पर लागल आरोप “झूठ, आधारहीन आ दुर्भावनापूर्ण” अछि। ओ कहलनि जे वोटक बदला नकदी विवादमे अपन विरुद्ध देल गेल बयानक लेल ओ तीनू नेतासँ माफी मांगबाक माँग कयलनि। जँ ओ सभ एना करबामे विफल रहैत छथि तँ हुनकालोकनिक विरुद्ध आपराधिक कार्यवाही शुरू करबाक लेल बाध्य होयताह। भाजपा नेता अपन आधिकारिक एक्स अकाउंट पर कानूनी नोटिसक स्क्रीनशॉट सेहो साझा कयलनि अछि। ओ कांग्रेस पर अपन निम्न स्तरक राजनीतिसँ झूठ पसारय आ देशकेँ गुमराह करबाक आरोप लगओलनि अछि।
विनोद तावड़े इहो कहलनि जे कांग्रेसक एकमात्र एजेंडा झूठ पसारब अछि। नालासोपारा मामिलामे आधारहीन आरोप लगाबय केर लेल हम कांग्रेस अध्यक्ष मल्लिकार्जुन खड़गे, राहुल गांधी आ हुनकर पार्टी प्रवक्ता सुप्रिया श्रीनेतक खिलाफ मानहानिक मुकदमा दायर कयलहुँ अछि। हमर आ भाजपाक छवि खराब करबाक प्रयासक बादो सत्य स्पष्ट अछि। चुनाव आयोग आ पुलिस द्वारा कयल गेल जाञ्चमे ५ करोड़ टाका कखनो बरामद नहिं कयल गेल अछि।ओ कहलनि जे ई मामिला कांग्रेसक निम्न स्तरक राजनीति आ देशकेँ गुमराह करबाक हुनकर हताश प्रयासकेँ देखबैत अछि। ई इहो देखबैत अछि जे भाजपा सत्य आ जनताक आस्थाक संग दृढ़तासँ ठाढ़ अछि।
वास्तवमे बहुजन विकास अघाड़ी (बीवीए) क नेता हितेन्द्र ठाकुर भाजपा पर विधानसभा चुनावसँ पहिने पैसा बँटबाक आरोप लगबैत कहलनि, “चुनाव आयुक्त एतय पाइ आ डायरीसँ भरल एकटा बैग जब्त कयने छथि। नामक सूची अछि, जे बताबैत अछि जे ककरा कतेक पाइ देल गेल अछि। भाजपाक एकटा नेता हमरा कहलनि जे 5 करोड़ रुपया आनल गेल अछि। कलेक्टर हमरा कहलनि जे हमरा प्रेस कॉन्फ्रेंस करय केर अनुमति सेहो नहिं अछि। हमरा पर बहूत दबाव अछि। एहि आरोपक बीच एकटा निर्वाचन अधिकारी मंगलदिन कहलनि जे होटलक कमरासँ ९.९३ लाख टाका नकद बरामद कयल गेल।
विनोद तावड़े पाइ बाँटबाक आरोपकेँ खारिज कयलनि आ कहलनि जे ओ मात्र चुनावक सम्बन्धमे पार्टी कार्यकर्तासभकेँ निर्देश देबाक लेल होटल गेल छलाह। तावड़े कहलनि, ” द विवांता होटल (विरार, पालघर) केर मालिक हितेन्द्र ठाकुर स्वयं छथि आ हम मूर्ख नहि छी जे हुनक होटलमे जा कऽ पाइ बाँटब। भाजपा नेता कहलनि जे ओ पिछला ४० सालसँ राजनीतिमे छथि आ चुनावसँ सम्बन्धित नियम आ दिशानिर्देशसँ नीक जकाँ वाकिफ छथि। हम बस पार्टी कार्यकर्तासँ गप्प करय गेल छलहुं, हम कोनो प्रचार नहि कए रहल छलहुं।”
