आइ-काल्हि राष्ट्रीय राजधानी दिल्लीमे साँस लेब कठिन भऽ गेल अछि। दिल्लीमे वायु प्रदूषण दिवालीक बादसँ लगातार गम्भीर श्रेणीमे बनल अछि। एहि कारणेँ आकाशमे धुंधक चादर सेहो देखबामे आबि रहल अछि, जकर प्रभाव कतेको तरहें पड़ि रहल अछि।
प्रदूषणक स्तर लगातार खराब होइत जा रहल अछि। एहि कारणेँ लोकसभकेँ बहुत रास स्वास्थ्य समस्या भऽ रहल अछि। दिल्ली-एनसीआर लेल ग्रैपकेँ वायु गुणवत्ताक चारि चरणमे विभाजित कयल गेल अछि – चरण १ “खराब” वायु गुणवत्ता सूचकांक (एक्यूआई) लेल जे २०१ सँ ३०० केर बीच अछि। चरण २ “बहुत खराब” एक्यूआई (३०१-४००), चरण ३ “गंभीर” एक्यूआई (४०१-४५०) आ चरण ४ “बहुत गंभीर” एक्यूआई (४५० सँ अधिक) लेल छैक।
ग्रैपक तेसर चरणक अन्तर्गत दिल्ली-राष्ट्रीय राजधानी क्षेत्र (एनसीआर)मे निर्माण गतिविधि पर रोक लगा देल गेल अछि। वाहन प्रदूषणकेँ आओर कम करबाक लेल मेट्रो सेवामे ६० अतिरिक्त यात्रा जोड़ल जायत, आ एमसीडी द्वारा धूलकणकेँ नियंत्रण करयवाला ६५ मशीनक संग सड़क साफ करय केर प्रयासकेँ सेहो बढ़ायल जाएत।
एकर अतिरिक्त, सड़क पर पानि छिड़कबाक लेल तीन पालीमे २०० मोबाइल एंटी-स्मॉग गनक उपयोग कयल जायत, आ प्रत्येक पालीमे निरंतर संचालन सुनिश्चित करबाक लेल निर्दिष्ट चालक होयत।
एम्हर दिल्ली सरकार निर्माण गतिविधिकेँ नियंत्रित करब, निजी निर्माण आ विध्वंसक काजपर प्रतिबन्ध लगायब, आ गैर-आवश्यक काजकेँ प्रतिबंधित करबाक लेल सेहो कदम उठा रहल अछि। राय कहलनि जे सार्वजनिक आ सरकारी सेवा हरदम जकाँ जारी रहत। ओ लोकसभसँ आग्रह कयलनि जे ओ कम दूरीक यात्राक लेल साइकिलक उपयोग करथि, सार्वजनिक परिवहनक उपयोग करथि आ जखनि सम्भव होयत घरसँ काज करब सहित आन उपाय करथि।
