राष्ट्रपति, प्रधानमंत्री सहित कतेको दिग्गज शारदा सिन्हाक निधन पर देलनि श्रद्धांजलि, राजकीय सम्मानक संग होएत अंतिम संस्कार

पटना
*

पद्म भूषणसँ सम्मानित शारदा सिन्हाक निधनसँ देश भरिमे शोकक लहर अछि। राष्ट्रपति द्रौपदी मुर्मू, प्रधानमंत्री नरेन्द्र मोदी, बिहारक मुख्यमंत्री नीतीश कुमार, राजद सुप्रीमो लालू प्रसाद यादव, उत्तर प्रदेशक मुख्यमंत्री योगी आदित्यनाथ, बाॅलीवुड सिंगर सोनू निगम, केन्द्रीय मंत्री गजेन्द्र सिंह शेखावत, झारखंडक मुख्यमंत्री हेमंत सोरेन सहित कतेको दिग्गज लोकनि हुनका श्रद्धांजलि देलनि।

राष्ट्रपति द्रौपदी मुर्मू प्रसिद्ध लोक गायिका शारदा सिन्हाक निधनपर शोक व्यक्त करैत कहलनि जे हुनकर मधुर गायन अमर रहत। राष्ट्रपति द्रौपदी मुर्मू एक्स पर लिखलनि, “बिहार कोकिलाक नामसँ प्रसिद्ध गायक डॉ. शारदा सिन्हा जीक निधनक समाचार बहुत दुखद अछि। शारदा सिन्हा मैथिली आ भोजपुरीमे बिहारी लोकगीतसभकेँ अपन मधुर स्वर दऽ संगीत जगतमे अपार लोकप्रियता प्राप्त कयलनि।” ओ लिखलनि, “आइ छठि पूजाक दिन हुनक मधुर गीत देश-विदेशमे भक्तिक अलौकिक वातावरण बना रहल होयत। शारदा सिन्हाकेँ वर्ष २०१८ मे कलाक क्षेत्रमे पद्मभूषणसँ सेहो सम्मानित कयल गेल छल। हुनकर मधुर गायन अमर रहत, हम हुनक परिवार आ प्रशंसकक प्रति अपन गहन संवेदना व्यक्त करैत छी।”

प्रधानमंत्री नरेन्द्र मोदी ट्वीट कयलनि, “प्रसिद्ध लोक गायिका शारदा सिन्हा जीक निधनसँ बहुत दुखी छी। हुनका द्वारा गाओल गेल मैथिली आ भोजपुरी लोकगीत पिछला कतेको दशकसँ बहुत लोकप्रिय रहल अछि। आस्थाक महान पाबनि छठिसँ जुड़ल हुनक मधुर गीत सदैव गूंजैत रहत। हुनकर निधन सङ्गीत दुनियाक लेल एकटा अपूरणीय क्षति अछि। दुखक एहि घड़ीमे हमर संवेदना हुनक परिवार आ प्रशंसकक संग अछि। ॐ शान्ति !”

बिहारक मुख्यमंत्री नीतीश कुमार शारदा सिन्हाक निधनपर दुख व्यक्त कयलनि। ओ कहलनि “बिहार कोकिला शारदा सिन्हा एकटा प्रसिद्ध गायिका छलीह। मैथिली, भोजपुरीक अतिरिक्त ओ हिन्दी गीत सेहो गओलनि। ओ कतेको हिन्दी चलचित्रमे सेहो अपन मधुर आवाज देलनि। सङ्गीत जगतमे हुनक योगदानक लेल भारत सरकार हुनका १९९१ मे पद्मश्री आ २०१८ मे पद्मभूषणसँ सम्मानित कयलक। शारदा सिन्हाक छठि महापर्व पर मधुर आवाजमे गाओल जायवला मधुर गीत बिहार आ उत्तर प्रदेश सहित देशक सभ भागमे गूंजत अछि। हुनक निधनसँ सङ्गीतक क्षेत्रमे अपूरणीय क्षति भेल अछि।”

उत्तर प्रदेशक मुख्यमंत्री योगी आदित्यनाथ दुख व्यक्त करैत लिखलनि, “प्रसिद्ध लोक गायिका पद्मभूषण डॉ. शारदा सिन्हाक निधन सम्पूर्ण संगीत जगतक लेल बहुत दुखद आ अपूरणीय क्षति अछि। हुनका विनम्र श्रद्धांजलि ! अपन उत्कृष्ट पारम्परिक गायनक माध्यमसँ ओ मैथिली, भोजपुरी सहित कतेको लोक भाषा आ लोक संस्कृतिक सेवा कयलनि आ हुनका राष्ट्रीय मंच पर सम्मान दियौलनि। हम भगवान श्रीरामसँ प्रार्थना करैत छी जे दिवंगत पवित्र आत्माकेँ हुनक चरणमे स्थान दियौक आ हुनक शोक संतप्त परिवार आ प्रशंसकसभकेँ ई अथाह दुःख सहबाक शक्ति देथि। ओम शान्ति !

बॉलीवुड गायक सोनू निगम शारदा सिन्हाक निधनपर शोक व्यक्त कयलनि। ओ एक्स पर एकटा पोस्ट पोस्ट करैत लिखलनि, “महापर्व छठि पूजाक दौरान आदरणीय शारदा सिन्हा जीक निधन बहुत दुखद अछि। छठि मैया अहांकेँ अपन कोरामे स्थान देथि। अहाँ अपन आवाजक माध्यमसँ सदैव लोकक हृदयमे रहब, ॐ शान्ति !”

राष्ट्रीय जनता दल (राजद) प्रमुख लालू प्रसाद यादव प्रसिद्ध लोक गायिका शारदा सिन्हाक निधनपर शोक व्यक्त कयलनि। ओ कहलनि, “हर परिवार हुनकर गीत सुनैत छल। हम सूर्य भगवानसँ प्रार्थना करैत छी जे शारदा सिन्हाक आत्माकेँ शान्ति प्रदान करथि। ई बिहारक लेल बड़का क्षति अछि…।”

संगहि संग केंद्रीय मंत्री गजेन्द्र सिंह शेखावत, झारखंडक मुख्यमंत्री हेमंत सोरेन सहित कतेको आओर दिग्गज लोकनि हुनका श्रद्धांजलि देलनि।

प्रसिद्ध लोक गायिका शारदा सिन्हाक निधनपर हुनक बेटा अंशुमन सिन्हा कहलनि, “ई हमरा सभक लेल दुखद क्षण अछि। छठि पूजाक पहिल दिन ओ हमरा सभकेँ छोड़ि चलि गेलीह, ओ सदैव लोकक हृदयमे रहतीह।”

भाजपा नेता मनोज तिवारी कहलनि जे शारदा सिन्हाक अंतिम संस्कार पटनामे कयल जायत। पार्थिव शरीरकेँ बुधकेँ भोरे इंडिगोक उड़ानसँ पटना लऽ जायल जायत। ओ कहलनि जे हवाई अड्डा पर कागजी कारवाई प्रक्रियामे डेढ़सँ दू घंटा लागि सकैत अछि। मनोज तिवारी कहलनि जे शारदा सिन्हाक अंतिम संस्कार पटनामे राजकीय सम्मानक संग कयल जायत। शारदा सिन्हाक मंगलदिन राति ७२ वर्षक आयुमे निधन भऽ गेलनि।

मनोज तिवारी बतौलनि जे बुधक दुपहरिया १२ बजेक बाद शारदा सिन्हाक पार्थिव शरीर अंतिम दर्शन लेल पटनामे राखल जायत।

प्रसिद्ध लोक गायिका शारदा सिन्हा (७२) दिल्लीक एम्समे अंतिम सांस लेलनि। ई समाचार देश भरिमे हुनक शुभचिंतकसभकेँ चौंका देलक। शारदा सिन्हा द्वारा गाओल गेल छठि गीत एखनो सभ ठाम बाजि रहल अछि आ एहि महान पाबनिक बीच हुनक निधनक खबरि प्रशंसकसभकेँ दुःखी ओ अचंभित कऽ देलक अछि।