दरभंगा जिलाक टेकटार पंचायत स्थित मथूपुर गाममे छह दिवसीय श्यामा पूजा महोत्सवक शुरुआत भऽ चुकल अछि। मधुपुर स्थित श्यामा मंदिरसँ बुध दिन भव्य कलशयात्रा निकालल गेल। कलश यात्रामे १००८ सँ बेसि कन्या भाग लेलनि। करीब २ किलोमीटर लंबा कतारमे हजारों भक्त उपस्थित छलाह। टेकटारमे कमला नदी पर वैदिक मंत्रक जापक बीच विशेष पूजा कयल गेल। एकर बाद ओतयसँ कलश भरलाक बाद फेर श्यामा मंदिर परिसरमे आओल गेल। एहि समयावधिमे बैंड बाजा आ भक्ति संगीतक निरंतर धारा बहैत रहल ।
कलश यात्राक दौरान यातायात प्रणाली केर सुचारू रूपसँ चलाबय लेल सब कार्यकर्ता मुस्तैद देखल गेलाह। प्रशासन द्वारा विशेष व्यवस्था सेहो कयल गेल छल। कलश यात्रा समाप्त भेलाक बाद माँ भगवतीक विशेष प्रसादक वितरण कयल गेल |
एहि अवसर पर शिव श्यामा धाम धर्मार्थ सेवा ट्रस्टक अध्यक्ष गिरधारी झा, शंकर नाथ झा बटोही, श्याम नंदन झा, रविन्द्र झा, अमित झा, हेमचंद्र झा, युधिष्ठिर झा, नवीन मंडल, सजन झा एवं सैकड़ों कार्यकर्ता उपस्थित छलाह |
बृहस्पतिकेँ मां श्यामाक अति विशिष्ट अभिषेक कयल गेल। एहि अवसर पर मंदिर परिसर भक्त लोकनिसँ भरल रहल। रात्रिमे मां श्यामाक निशा पूजा कयल गेल। ज्ञात होय कि मधुपुरक श्यामा मंदिरक ख्याति दूर दराजक क्षेत्र धरि अछि। मंदिर परिसरमे दर्शन-पूजन आ मेलाक आनंद उठाबय लेल हजारों लोगक जुटान छल।
