पुलिस टीम पर भेल हमलाक संबंधमे मृत्युंजय तिवारी कहलनि कि बिहारमे कानून व्यवस्थाक स्थितिक अंदाजा एहि बातसँ लगाओल जा सकैत अछि जे वर्दी पर्यंत एतय सुरक्षित नहि अछि।
मोतिहारीमे एकटा लड़कीक अपहरणक आरोपीकेँ गिरफ्तार करय लेल गेल पुलिस टीमकेँ शुक्रकेँ आरोपीक परिवार आ पड़ोसी मिलि कऽ पीटि देलक। आब जेडीयू आ राजद एहि पर अपन प्रतिक्रिया देलक अछि। राजद जतय सरकार पर हमला कयलक अछि, ओतहि जेडीयू कहलक अछि जे एहि मामिला पर सख्त कार्रवाई कयल जायत।
राजद नेता मृत्युंजय तिवारी कहलनि जे बिहारमे कानून व्यवस्थाक स्थितिक अंदाजा एहि बातसँ लगाओल जा सकैत अछि जे वर्दी पर्यंत एतय सुरक्षित नहिं अछि। पुलिस टीम पर हमलासँ पता चलैत अछि जे एनडीए सरकारक अधीन कियो सुरक्षित नहिं अछि।
जेडीयू नेता नीरज कुमार कहलनि, बेटी सभक अपहरण पाप अछि, जे एहि कृत्य पर कारवाई करय लेल गेल पुलिस टीम पर हमला कयलक, तकरा सभ पर कठोरसँ कठोरतम कारवाई होएत। बेटीक सम्मानक संग कोनो समझौता नहि होएत। एसआईटी केर गठन कएल गेल अछि, आरोपीक खिलाफ जल्दिये कारवाई होएत।
जनतब जे मोतिहारीक पहाड़पुर थानामे दूटा लड़कीक अपहरणक मामिला दर्ज कयल गेल। बुधदिन पुलिस शंभू भगतक आरोपी बेटाकेँ गिरफ्तार करबाक लेल सरेया लिपनी गाम गेल, जकरा पर लड़कीक अपहरणक मामिला दर्ज कयल गेल छल। जखनि पुलिस ओतय पहुँचल तखनि युवकक परिवार आ पड़ोसीसभ हुनका पर हमला कऽ देलक। पुलिसकेँ गाड़ीसँ खीँचि कऽ पीटि देल गेल। थाना अधिकारी पिस्तौल निकालि लोकसभकेँ डरयबाक प्रयास कयलनि, मुदा हुनक माथ फाटि गेल।
