मिथिला सहित सम्पूर्ण बिहार प्रदेश लेल, बाढ़ि कोनो नव गप्प नहि अछि, लगभग हर वर्ष गंगा, कमला आ कोसीक संग – संग तमाम सहायक नदी अप्पन रौद्र रूप देखबिते अछि। एखन, क्षेत्रक मधुबनी, दरभंगा, सहरसा, सुपौल संगहि आनो जिलाक निवासी बाढ़िसँ त्रस्त छथि। हजारो लोक अप्पन घर आँगन छोड़ि रहत शिविर वा सड़क पर रहए लेल विवश छथि। सरकारी व्यवस्थाक बावजूदो प्रभावित लोक लग जरुरी चीज वस्तुक आभाव छैक। सरकार अप्पन कार्य क’ रहल अछि, मुदा सामाजिक संगठन सभ सेहो बाढ़िग्रस्त क्षेत्रमे जरुरी समानक आपूर्ति करबा रहल अछि। कएक ठाम राहत शिविर लगाओल गेल अछि।
मिथिलासँ बाहर रहनिहार मैथिल सभ सेहो अपना स्तर सँ लोकक दुःख, कम करबाक प्रयास क’ रहल छथि। एहि क्रममे, ठाणे (मुंबई) निवासी भारत भूषण सम्मान सँ सम्मानित डॉक्टर प्रमोद कुमार झा सेहो मानवताक परिचय दैत, मिथिला क्षेत्रमे बाढ़ि पीड़ितक सहायताक लेल आगू आयल छथि। जनतब दी जे प्रमोद झा, कोरोना कालमे सेहो अपना स्तर सँ लोकक सहायता लेल सदैव तत्पर छलथि। एखन मिथिला क्षेत्रक बाढ़ि पीड़ित लेल खाद्य पदार्थक संग संग आवश्यक समानक व्यवस्था करबा रहल छथि। मुंबईसँ ट्रक द्वारा खाद्य पदार्थ आ जरुरी सामान, मधुबनी, मोतिहारी, मुजफ्फरपुर, सीतामढ़ी, भागलपुर, सहरसा, पूर्णिया आ मधेपुराक बाढ़िग्रस्त क्षेत्र लेल भेजल जा चुकल अछि। डॉ प्रमोद, मुंबईमे अप्पन हित – अपेक्षित आ व्यापारी वर्गक सहयोगसँ जे चीज वस्तु एकत्रित कएलनि, ओकर वितरण मिथिलाक बाढ़िग्रस्त क्षेत्रमे ओहि ठामक स्थानीय सेवाधारीक सहयोगसँ वितरित कएल जा रहल अछि।
डॉ प्रमोद कुमार झा, मूल रूपसँ मधुबनी जिलाक बाबू पाली गामक रहनिहार छथि आ वर्तमान में मुंबई में रहि अप्पन जीवन यापनक संग – संग समाजसेवाक कार्य क’ रहल छथि।
