मिथिलाक्षर दिवस (०९-१०-२०२४) पर एक्स पर ट्रेंडमे मिथिलावासी देखौलनि जागरुकता
*
मधुबनी समदिया
*
मिथिलाक्षर दिवस (०९ अक्टूबर) पर बुधकेँ दुपहरिया ०२:०० बजेसँ ०४:०० बजे धरि मिथिला-मैथिलीक अनेक मुद्दा #MithilaksharDiwas केर माध्यमसँ एक्स पर ट्रेंड करैत रहल। मिथिलावासीक जागरूकता सराहनीय रहल।
ट्रेंडक माध्यमसँ ‘मिथिलाक पहिचान मिथिलाक्षर निशान’क मुद्दा, तीसो जिलावाला मिथिलाक विद्यालयमे ‘प्राथमिक वर्गक पढ़ौनीक माध्यम मैथिली’क मुद्दा, ‘मैथिली केर शास्त्रीय भाषाक दर्जा’ देबय केर मुद्दा, ‘मैथिली पत्र-पत्रिका केर सेहो राजकीय सहयोग भेटय’ केर मुद्दा, ‘शत-प्रतिशत शिक्षा’ सुनिश्चित करय केर मुद्दा आदि अनेक मुद्दा एक्स पर ट्वीट केर माध्यमसँ छाओल रहल।
मिथिलाक्षर साक्षरता अभियानक संस्थापक अजय नाथ झा शास्त्री कहलनि, “समीक्षात्मक दृष्टिकोणसँ मिथिलावासीक उत्साह केर जतेक प्रसंशा कयल जाय से कम होयत। मिथिलाक्षर साक्षरता अभियानी मिथिलाक्षरकेँ व्यवहार पथ पर प्रायः आनि देलनि आ आइ मिथिलावासी जखनि दिवस विशेष पर एहि तरहसँ उत्साह देखबैत अछि, तऽ थोड़ेक करेज केर ठंढ़क अवश्य पहुँचैत छैक। ‘थोड़ेक’ एहि लेल कहलौंह की मिथिला-मैथिलीक विशाल लक्ष्य अछि आ बहुत रास काज एखनि बाकी अछि।”
ओ आगू कहलनि जे मिथिलाक्षर दिवसक एहि ट्रेंडक लेल मिथिलावासी समेत समस्त अभियानीगण वंदनीय छथि, अभिनंदनीय छथि।
