मुजफ्फरपुरमे बाढ़ि रेस्क्यूमे लागल भारतीय वायुसेनाक एकटा हेलीकॉप्टर क्रैश

मुजफ्फरपुर
*

बिहारमे बाढ़िक बीच एकटा पैघ दुर्घटना भेल अछि। बचाव अभियानमे लागल वायुसेनाक एकटा हेलीकॉप्टर दुर्घटनाग्रस्त भऽ गेल अछि। ई घटना मुजफ्फरपुरक औराई नया गामक वार्ड १३ मे भेल।

दुर्घटनाग्रस्त हेलीकॉप्टर राहत सामग्री बाँटि सीतामढ़ीसँ घुरि रहल छल, तखन ओ दुर्घटनाक शिकार भऽ गेल। दुर्घटनाक समय दूटा पायलट सहित वायु सेनाक तीनटा आन कर्मी हेलीकॉप्टरमे सवार छलाह आ सभ गोटे बाल-बाल बचि गेलाह।

हेलीकॉप्टर दुर्घटनाक कारणमे
वायुसेनाक अधिकारीसभक कहब छनि जे प्रारम्भिक जाञ्चक अनुसार ई दुर्घटना तकनीकी खराबीक कारण भेल। उड़ानक दौरान हेलीकॉप्टरमे अचानक खराबीक कारण, पायलटकेँ आपातकालीन लैंडिंग करय लेल बाध्य होबय पड़ल, मुदा तथापि ओहि दौरान हेलीकॉप्टर क्रैश भऽ गेल। वर्तमानमे एहि घटनाक पूर्ण जानकारी विस्तृत जाञ्चक बादे प्रकट कयल जायत।

बिहारमे बाढ़िक कारण लाखो लोक प्रभावित भेल अछि, आ सरकार द्वारा राहत कार्य चलि रहल अछि। वायुसेना, एनडीआरएफ आ अन्य बचाव दल राहत सामग्री आ लोकसभकेँ सुरक्षित स्थान पर पहुँचाबय लेल चौबीसों घंटा काज कऽ रहल अछि। वायु सेनाक हेलीकॉप्टर एहि अभियानमे आ प्रभावित क्षेत्रमे राहत सामग्री पहुँचयबामे महत्वपूर्ण भूमिका निभा रहल अछि।

जेना-जेना हेलीकॉप्टर दुर्घटनाक समाचार पसरल, स्थानीय लोकमे दहशतक माहौल पसरि गेल। मुदा, वायुसेनाक जवानक सुरक्षाक खबरि लोकसभकेँ राहत देलक। गामक लोकक इहो कहब जे, जँ हेलीकॉप्टर बस्ती लग खसि पड़ैत तँ एहिसँ पैघ क्षति भऽ सकैत छल।