बिहारक भागलपुरक शाहजंगी मैदान लग मंगल दिन लगभग २ बजे बम विस्फोट भेल, जाहिमे ओतय खेलैत ७ गोट बच्चा ओकर चपेटमे आबि गेल। खेलक दौरान भेल विस्फोटमे तीनटा बच्चा बेसी झुलसल अछि, शेष चारि गोटेक हालत खतरासँ बाहर कहल जा रहल अछि। सभटा घायलकेँ इलाजक लेल सदर अस्पतालमे भर्ती कयल गेल छल, जतय चिकित्सक तीनटा बच्चाक गम्भीर स्थितिकेँ देखैत मायागंज अस्पतालमे रेफर कऽ देलनि अछि।
स्थानीय लोकक कहब छनि जे विस्फोट एतेक तेज छल जे बमक आवाज लगभग १ किलोमीटर दूर धरि सुनल गेल। विस्फोटक बाद घटनास्थल पर अफरातफरी पसरि गेल। सिटी एसपी के. रामदासक अनुसार, एकटा फोरेंसिक टीम घटनास्थल पर मौजूद अछि। ई विस्फोट हबीबपुर थाना क्षेत्रक शाहजंही मैदानमे भेल छल। मन्नूक माय रुक्सार कहलनि, “बम कोना फटल नहिं पता, विस्फोट भेल। जखन हम हल्ला सुनलौं तखन हम बाहर आयल आ देखलौं जे बच्चा खूनसँ लथपथ छल। बहुत जोरसँ विस्फोट भेल छल। हम अपन दूनू बच्चाकेँ अस्पताल लए गेलहुं। बच्चा शाहजंगी मैदान लग खेलय गेल छल।
१५ जून २०२३केँ भागलपुरमे बम विस्फोट भेल छल। विस्फोटमे दूटा बच्चा घायल भेल छलइ। ई घटना नाथनगर क्षेत्रक मनोहरपुरमे भेल छल। ई बम मनोहरपुर गामक बगीचामे एकटा चबूतरा लग झाड़ीक बगलमे राखल गेल छल। एम्हर आम लेबय गेल दूटा बच्चा एकरा चपेटमे आबि गेल। एहि विस्फोटमे धर्मेन्द्र चौरसियाक बेटा बलवीर (६) आ किसु कुमारी (८) घायल भऽ गेल। विस्फोटक आवाज लगभग आधा किलोमीटर धरि सुनल गेल छल।
४ मार्च २०२२ केँ भागलपुरमे बम बनबैत काल भेल विस्फोटमे १४ लोकक मृत्यु भऽ गेल छल। राति लगभग ११.३० बजे जबरदस्त विस्फोट भेल छल। एहि कारणेँ ५ किलोमीटर धरिक क्षेत्र हिल गेल छल। ओतहि बमक विस्फोटसँ चारिटा घर ढहि गेल। १४ शव बरामद कएल गेल छल। एकर अतिरिक्त एहि विस्फोटमे १० गोटे गम्भीर रूपसँ घायल सेहो भेल छलाह।
