“बेटी है तो कल है” एहि सामाजिक संस्था द्वारा 2 अक्टूबर 2024, बुधदिन बेरुपहर 3 बजेसँ रात्रि 10 बजे धरि मीरा भायंदर क्षेत्रमे पहिल बेर, हर जाति – धर्मक सामूहिक सांस्कृतिक कार्यक्रमक आयोजन कएल जाएत। बाला साहेब ठाकरे मैदान, इंद्रलोकमे प्रस्तावित एहि आयोजनमें, महाराष्ट्रक मुख्यमंत्री एकनाथ शिंदे, श्रीकांत शिंदे (सांसद) संगहि केंद्रीय मंत्री चिराग पासवान, मुख्य अतिथिक रूपमे आमंत्रित छथि। संस्था द्वारा पहिनहु नारी शक्तिक विकास लेल अनेको कार्यक्रम आदि कएल जाइत रहल अछि। बेटी बचाओ – बेटी पढ़ाओ केर उद्देश्य पर कार्य करैत एहि संस्था द्वारा, बालिका सभकेँ अनेको तरहक सहायता देल जाइत रहल अछि। संस्थाक सर्वेसर्वा सतीश झा जानकारी दैत कहलनि कि, एहि कार्यक्रममे अप्पन संस्कृति संरक्षणक उद्देश्यसँ अनेको स्टॉल सेहो लगाओल जाएत। एहि समारोहक सफलताक लेल, संस्थाक सदस्य संगीता झा, सरिता झा, विनीता झा संगहि स्वयं सतीश झा समाजक तमाम बुद्धिजीवीसँ भेंट करैत रहल छथि। एहि क्रममे संस्थाक प्रतिनिधि मंडल दिल्ली जा, केंद्रीय मंत्री नितिन गडकरी संगहि अनेको आन मंत्रीगणसँ भेंट कएलनि। सतीश झा के अनुसार, एहि कार्यक्रममे, स्थानीय विधायक प्रताप सरनाईक, गीता जैन, पूर्व सांसद संजय निरुपम, विक्रम प्रताप सिंह, नरेश म्हस्के, दीपक केसरकर, वृषाली शिंदे, अमृता फडवणीस’ आरती झा लोक गायिका जुली झा, पार्श्व गायक कुमार सानू फिल्मस्टार गोविंदा संगहि अनेको आन विशिष्ठ व्यक्तित्वकेँ आमंत्रित कएल गेल अछि। बेटी है तो कल है, एहि संस्थाक तमाम महिला कार्यकर्त्ता एहि समारोहक सफलताक लेल अत्यधिक परिश्रम क’ रहल छथि। एहि कार्यक्रम के ल’ क’ मुंबई आ आसपासक मैथिल समाज अत्यंत उत्साहित अछि।
