चुनावसँ पहिने एकटा महत्वपूर्ण डेग उठाबैत महाराष्ट्र सरकार देशी गायकेँ ‘राज्य माता’क दर्जा देबाक निर्णय लेलक अछि। ई निर्णय राज्यमे देशी नस्लक गायक संरक्षण आ संवर्धनकेँ बढ़ावा देबाक उद्देश्यसँ लेल गेल अछि। सरकारक एहि निर्णयकेँ पशुपालन आ ग्रामीण अर्थव्यवस्थाकेँ सशक्त बनयबाक दिशामे एकटा पैघ डेगक रूपमे मानल जा रहल अछि।
गायकेँ राज्य माताक दर्जा देलाक बाद राज्यक मुख्यमंत्री एकनाथ शिंदे कहलनि कि देशी गाय हमर किसानक लेल वरदान अछि, एहि लेल हम ई दर्जा देबाक निर्णय लेलहुं आ एकर संवर्धन लेल चारा केर व्यवस्था सेहो कयलहुं। सरकार देशी गाय पालनक लेल सब्सिडी योजना सेहो शुरू करत। सोमकेँ भेल मंत्रिमंडलक बैसारमे एकरा मंजूरी देल गेल अछि।
मुख्यमंत्री एकनाथ शिंदेक अध्यक्षतामे भेल मंत्रिमंडलक बैसारमे ३८ निर्णयकेँ मंजूरी देल गेल। राजस्व विभागक तहत कोतवालकेँ वेतनमे दस प्रतिशतक बढ़ोत्तरी केर मंजूरी देल गेल अछि। संगहि, हुनका सभ पर अनुकंपा नीति सेहो लागू कयल जायत। एकर सङ्गहि राज्यमे सैन्य विद्यालयक लेल संशोधित नीतिक कार्यान्वयनकेँ सेहो मंजूरी देल गेल अछि। ठाणे सर्कुलर मेट्रो रेल परियोजनाक काजमे तेजी आओत। एहि पृष्ठभूमिमे १२ हजार २०० करोड़ केर संशोधित योजनाक सेहो मंजूरी देल गेल अछि।
