प्रधानमंत्री नरेन्द्र मोदीक प्रयाससँ उत्तर प्रदेशकेँ एक ट्रिलियन डॉलरक अर्थव्यवस्था बनबामे सहायता भेटत। ई बयान केन्द्रीय वाणिज्य आ उद्योग मंत्री पीयूष गोयल देलनि। केन्द्रीय मंत्री कहलनि जे प्रधानमंत्री नरेन्द्र मोदीक मार्गदर्शनमे आ मुख्यमंत्री योगी आदित्यनाथक नेतृत्वमे राज्य सरकार भारतकेँ पहिल चरणमे ५ ट्रिलियन डॉलरक अर्थव्यवस्था बनयबामे सहायता करत, आ २०४७ धरि ‘विकसित भारत’ आ ३५ ट्रिलियन डॉलरक अर्थव्यवस्थाक लेल एकटा मजबूत आधारक रूपमे सेहो काज करत।
उत्तर प्रदेश इंटरनेशनल ट्रेड शो (यूपीआईटीएस) मे अपन संबोधनक दौरान केंद्रीय मंत्री कहलनि जे मुख्यमंत्री योगी आदित्यनाथ द्वारा लागू औद्योगिक आ अन्य सक्रिय नीतिक कारण उत्तर प्रदेश पूरा देशमे विकासक मॉडलक रूपमे उभरत।
‘मेक इन इंडिया’ कार्यक्रमक चर्चा करैत गोयल कहलनि जे २५ सितम्बर २०१४ केँ प्रधानमंत्री मोदी एहि काजक शुभारम्भ कयलनि, जाहिसँ पैघ संख्यामे युवागणकेँ रोजगारक अवसर उत्पन्न भऽ सकय।
ओ आगू कहलनि, केन्द्र आ उत्तर प्रदेश सरकारक संयुक्त प्रयाससँ हम ग्रेटर नोएडामे एकटा औद्योगिक स्मार्ट सिटी आ देशभरिमे २०टा औद्योगिक स्मार्ट सिटीक निर्माण कऽ रहल छी।
गोयल कहलनि जे भारत नीक गुणवत्तावला उत्पाद आ सेवा प्रदान करबाक लेल पूरा दुनियामे जानल जाइत अछि। उत्पादक निर्माण करैत काल हमरा इहो ध्यान राखय पड़त जे ‘मेड इन इंडिया’क अन्तर्गत जे किछु उत्पाद बनैत अछि, ओ नीक गुणवत्ताक होइत अछि।
२५ सँ २९ सितम्बर धरि चारि दिवसीय एहि ट्रेड शोमे २५०० सँ बेसी प्रदर्शक आ एक लाखसँ बेसी लोक भाग लेने छलथि।
