प्रसिद्ध लोक गायिका शारदा सिन्हाक पति डॉ. बृजभूषण सिन्हाक ८० वर्षक आयुमे निधन भऽ गेलनि। मस्तिष्क रक्तस्रावक कारण हुनकर मृत्यु भऽ गेलनि।
पद्मश्री आ पद्म विभूषणसँ सम्मानित प्रसिद्ध लोक गायिका शारदा सिन्हाक पति डॉ. बृजभूषण सिन्हाक निधन भऽ गेलनि। ओ ८० वर्षक छलाह। दू दिन पहिने घरमे खसि पड़लासँ हुनका माथमे चोट लागल छल। चोटक कारण मस्तिष्क रक्तस्राव भेल। ओकर बाद हुनका पटनाक एकटा अस्पतालमे भर्ती कराओल गेल जतय ओ वेंटिलेटर पर छलाह। २२ सितंबरकेँ हुनकर निधन भऽ गेलनि। डॉ. बृजभूषण सिन्हा शिक्षा विभागमे क्षेत्रीय उप निदेशकक रूपमे सेवानिवृत्त भेल छलथि।
शारदा सिन्हा एकटा साक्षात्कारमे कहने छलीह जे सौभाग्यवश हमरा जकाँ हमर पति बृजकिशोर सिन्हाकेँ सेहो गीतसँ विशेष लगाव अछि। १९७० मे जखनि हमर विवाह भेल आ बेगूसरायमे अपन ससुराल गेलहुँ तखनि माहौल एकदम अलग छल। मैथिली सेहो अलग ढ़ंगसँ बाजल जाइत छल। हमर सासु कहैत छलीह जे घर तक तऽ भजन-कीर्तन ठीक अछि, मुदा ओकर आगू गायन-वादन नहिं चलत। हमरा घरमे घरक बहू बाहर जा कऽ नहिं गबैत अछि, तेँ अहाँ सेहो नहिं गायब। हमर ससुलकेँ भजन-कीर्तन सुनब बहुत नीक लागैत छलनि।
ओ आगू कहलनि जे विवाहक पाँचे दिन भेल छल, तखने हमर गामक मुखिया हमर घर आबि ससुरकेँ कहलकनि जे अहाँक पुतौहू बहुत नीक गबैत छथि। अहाँ अपन पुतौहसँ ठाकुरबाड़ीमे भजन गाबय लेल कहू। ससुर हुनका ठाकुरबाड़ीमे भजन गयबाक अनुमति दऽ देलनि। ई सुनि हमर खुशीका ठिकाना नहिं रहल, मुदा सासु ठाकुरबाड़ीमे गाबय लेल नाराज भऽ गेलीह, एहेन समयमे हमर पति हमर सहयोग कयलनि आ ओ सासुकेँ मना लेलनि।
शारदा सिन्हा ८ मई, २०२० केँ गाओल गेल अपन गीतक स्मरण कयलनि, जखन ओ अपन ५०म विवाहक वर्षगाँठ मनौलनि- ‘कहे तो से सजना ये तोहरी सजनिया… पग-पग लिए जाऊं तोहरी बलइयां…’ शारदा सिन्हा विवाहक ५०म वर्षगाँठक अवसर पर सोशल मीडिया पर लिखलनि, ‘अहाँ एकटा स्तम्भक रूपमे अडिग रहलहुँ, प्रत्येक डेग एक संग भेल। आइ हम अहांक संग बैसि प्रत्येक ओहि पल केर याद करब, जाहिमे दाम्पत्य जीवनक धैर्य, सहिष्णुता, प्रीत, स्नेह, दृढ़ता आ युगल भावनाक मिसाल उपस्थित रहल अछि।’
