आम आदमी पार्टीक नेता आतिशी दिल्लीक छठम मुख्यमंत्रीक रूपमे शपथ लेलनि अछि। उपराज्यपाल वीके सक्सेना राज निवासमे आतिशी आ हुनक मंत्रिपरिषदकेँ शपथ दियेलनि।
चारिटा वर्तमान मंत्री गोपाल राय, कैलाश गहलोत, सौरभ भारद्वाज आ इमरान हुसैन अपन स्थान बरकरार रखताह जखन कि दलित विधायक मुकेश अहलावत मंत्रिमंडलमे नव चेहरा छथि। एकटा मंत्री पद एखनो खाली रहत।
आतिशी भाजपाक सुषमा स्वराज आ कांग्रेसक शीला दीक्षितक बाद दिल्लीक तेसर महिला मुख्यमंत्री भेलीह। केजरीवालक इस्तीफाक बाद आतिशी विधायक दलक नेता चुनल गेलीह।
एहिसँ पहिने कालकाजी सीटसँ विधायक आतिशी दिल्ली सरकारमे कतेको विभागक जिम्मेदारी सम्हारि चुकल छथि।
उच्चतम न्यायालय शराब नीति मामिलाक सीबीआई केसमे सशर्त जमानत देलक। जकर अनुसार हुनका अपन कार्यालय वा सचिवालय जयबाक अनुमति नहिं देल जायत, संगहि ओ उपराज्यपाल द्वारा अनुमोदित फाइलक अतिरिक्त कोनो अन्य फाइलपर हस्ताक्षर नहि कऽ सकैत छथि।
एहिसँ पहिने आतिशी मंगलक साँझ केजरीवालक सङ्ग राजनिवासमे उपराज्यपालसँ भेंट करबाक लेल गेल छलीह, जतय ओ अपन इस्तीफा सौंपि सरकार बनयबाक दावा पेश कयलनि।
आम आदमी पार्टीक नेता २६-२७ सितंबरकेँ आहूत विशेष सत्रमे ७० सदस्यीय विधानसभामे अपन सरकारक बहुमत साबित करतीह।
जमानत पर रिहा भेलाक बाद केजरीवाल कहने छलाह जे जँ अगिला चुनावमे लोक हुनका ईमानदार मानैत छथि तँ ओ एहि पद पर आपस आबि जेताह। मनोनीत मुख्यमंत्री आतिशी शुक्रदिन हुनका समर्थन व्यक्त कयलनि आ दावा कयलनि जे केवल हुनकर (केजरीवाल) नेतृत्वमे मुफ्त बिजली आ पानि सुनिश्चित कऽ दिल्लीवासीक लेल “बेहतर जीवन आ उज्जवल भविष्य” सुनिश्चित कऽ सकैत अछि।
