मंत्री जनक राम कहलनि – दलित समुदायक संग एहि प्रकारक अन्याय बर्दाश्त नहिं
*
पटना
*
बिहारक नवादामे दलितक बस्तीमे आगि लगयबाक घटना पर राजनीति धीपल अछि। सभ राजनीतिक दल अपनाकेँ सबसँ पैघ ‘हितकारी’ कहि एहि घटनामे ‘हाथ सेंकय’ केर कोशिश शुरू कऽ देलक अछि। राजनीतिक दल एक दोसरा पर दोष लगा रहल अछि।हिन्दुस्तानी अवाम मोर्चा (हम) प्रमुख आ केंद्रीय मंत्री जीतन राम मांझी आ राजद नेता तेजस्वी यादव एहि मामिलामे आमने-सामने आबि चुकल छथि।
जीतन राम मांझी शुक्रदिन राजद नेता तेजस्वी यादवक एहि बयान पर जवाब देलनि, जाहिमे तेजस्वी कहने छलथि – ‘हुनकर शिक्षा आरएसएस आ भाजपा स्कूलमे भेल अछि। तेजस्वी यादवक शिक्षा पर सवाल उठाबैत ओ कहलनि जे ई उल्टा बात अछि, चूँकि ओ पढ़ने नहिं छथि, तखनि शिक्षाक अर्थ की बुझताह। हम सभ शेड्यूल कास्टक निचला भागक लोक छी। हमरा पढ़बामे दिक्कत होइत छल, हम भूखल-पियासल पढ़ैत छलहुं। आ अपन योग्यतासँ मैट्रिक उत्तीर्ण कयलौंह, स्नातक कयलौंह। हमर बेटा सेहो एही तरहें पढ़लक अछि। आइ ओ कॉलेजमे प्रोफेसर छथि, तखनि आरएसएससँ एकर की प्रश्न अछि ?
एहिसँ पहिने नवादामे दलितक बस्ती जरलाक बाद जीतन राम माँझी कहने छलाह जे एहि घटनामे यादवलोकनिक हाथ अछि। एकर बाद तेजस्वी यादव कहने छलाह जे जीतन राम मांझी आ हुनकर बेटा आरएसएस आ भाजपासँ पढ़ि रहल छथि। जे लिखि कऽ देल जाइत अछि, ओ से पढ़ैत छथि।
भाजपाक मुख्य प्रवक्ता आ मंत्री जनक राम कहलनि, “नवादा घटना मानवता आ सामाजिक सद्भाव पर गंभीर हमला अछि। जाहि तरहें दलित समुदायकेँ एहि अमानवीय कृत्यक शिकार बनाओल गेल अछि, ओ नहिं केवल समाजक नैतिकता पर प्रश्न उठबैत अछि अपितु ई हमर संविधान द्वारा देल गेल अधिकारक विरुद्ध सेहो अछि।
मंत्री जनक राम कहलनि जे दलित समुदायक संग एहेन अन्याय बर्दाश्त नहिं कयल जा सकैत अछि। ओ कहलनि जे एहि मामिलाक दोषीसभकेँ कानूनक अनुसार सबसँ कठोर सजा देल जेबाक चाही। नवादा आगि लगबाक घटनामे पीड़ित पक्ष द्वारा मुफ्फसिल पुलिस स्टेशनमे प्राथमिकी दर्ज कयल गेल अछि। एहि मामिलामे २५ सँ बेसी लोककेँ आरोपी नामित कयल गेल अछि। पुलिस एहि मामिलाक जांच शुरू कऽ देलक अछि। पुलिस एखन धरि १५ गोटेकेँ गिरफ्तार कएलक अछि।
