विश्वविद्यालय प्रशासन द्वारा अखिल भारतीय विद्यार्थी परिषद्क कार्यकर्ता सभक खिलाफ मोकदमा दर्ज करबाक देेल गेल धमकीक विरोधमे कार्यकर्ता सम वृहस्पति दिन शंकर चौक पर मंडल विश्वविद्यालयक कुलपतिक पुतरा जरा कऽ विरोध कयलक। विश्वविद्यालयमे एबीवीपी मंडल विश्वविद्यालयक सिंडीकेट बैसारसँ पहिने कुलपतिक घेराव कयल गेल छल। एकर एक सप्ताहक बाद मंडल विश्वविद्यालय प्रशासन राज्य मंत्री आ राज्य सह मंत्री सहित एबीवीपी केर अन्य सभ कार्यकर्ताक खिलाफ मुकदमा दर्ज करबाक धमकी देल गेल छल।
अखिल भारतीय विद्यार्थी परिषदक कानूनी काज संयोजक मोनू झा कहला जे विश्वविद्यालय स्थापना कालसँ एखन धरि कोनो कुलपति द्वारा एहन क्रूर आ तानाशाही मानसिकतासँ कोनो काज नहिं भेल छल। ई पहिल बेर अछि जे विद्यार्थी सभक समस्या सुनबाक बदला हुनका सबहक उपर मुकदमा आ निलंबित आ निष्कासन करबाक परंपरा शुरू भ’ रहल अछि। जेकरा माध्यमसँ छात्रक मुद्दाकेँ दबायल जा रहल अछि।
जिला समन्वयक कृष्णकांत गुप्ता कहला कि कुलपति महोदय अखिल भारतीय विद्यार्थी परिषद सन राष्ट्रवादी छात्र संगठन केर असामाजिक तत्व आ आपराधिक प्रवृत्ति सन शब्दक प्रयोग कय अपन गरिमाकेँ कलंकित कऽ देलनि।अखिल भारतीय विद्यार्थी परिषद्क मांग अछि सौरभ यादवक पीएचडी नामांकन रद्द करबाक आदेश वापस लेल जाय अन्यथा अखिल भारतीय विद्यार्थी परिषद चरम आंदोलनक सहारा लेबय लेल मजबूर होमय पड़त।
एहि कार्यक्रममे एबीवीपी कॉलेजक मंत्री कृष्ण रजक, कॉलेजक उपाध्यक्ष अभिषेक सिंह, वरुण गुप्ता, सोशल मीडिया प्रभारी अभिज्ञान प्रताप, गणेश यादव, गौरव कुमार सहित अन्यान्य छात्र मौजूद छलाह।
