तेजस्वी यादव बिहारक मुख्यमंत्री नीतीश कुमार पर जासूसी करेबाक गंभीर आरोप लगओलनि अछि। तेजस्वी यादव कहलनि जे हमर एकटा बैसारमे सीआईडी आ स्पेशल ब्रांचक लोक बैसि कऽ नोट कऽ रहल छलथि।
बिहारक नेता प्रतिपक्ष आ पूर्व उपमुख्यमंत्री तेजस्वी यादव राज्यक मुख्यमंत्री पर गंभीर आरोप लगओलनि अछि। ओ नीतीश कुमार पर सीआईडी आ स्पेशल ब्रांचसँ जासूसी करेबाक आरोप लगओलनि अछि। ओ कहलनि सीआईडी आ विशेष शाखाक कर्मी हमर कार्यकर्ता सभक संग बैसारमे बैसल छलाह। ओ लोकक पहचान हुनकर आईडीसँ भेल।
झंझारपुरमे पार्टी कार्यकर्ता सभक सङ्ग अपन बातचीत समाप्त भेलाक बाद तेजस्वी यादव गेस्ट हाउसमे मीडियासँ बातचीत कयलनि। एहि वार्तालापक क्रममे ओ मुख्यमंत्रीपर भयंकर हमला कयलनि आ गम्भीर आरोप लगेलनि। ओ कहलनि, ‘ एक ठाम हमर बैसारमे सीआईडी आ स्पेशल ब्रांचक लोक बैसल नोट कऽ रहल छल। हम सोचलहुं जे पत्रकार छथि। पार्टीक आन्तरिक बैसारमे पत्रकार फोटो खिंचलाक बाद बाहर चलि जाइत छथि। मुदा किछु लोक जयबाक नाम नहिं लए रहल छलाह। बादमे पता चलल जे ओ सभ स्पेशल ब्रांच आ सीआईडीक लोक छलाह। ओ सभ अपन कार्ड देखौलनि।
तेजस्वी यादव एकर बाद कहलनि, “मुख्यमंत्री पूरा तरीकासँ जासूसी करबा रहल छथि, ई स्पष्ट भऽ गेल अछि। ओ भयभीत छथि, डरल छथि।”
तेजस्वी यादव एतबू पर नहिं रुकलाह आ सीएम नीतीश कुमार पर आओर बेसी आरोप लगओलनि। तेजस्वी यादव कहलनि, “नीतीश कुमारक इकबाल खतम भऽ गेल अछि। आब बिहार हुनकासँ सम्हरि नहिं पाबि रहल अछि। भूमि सर्वेक्षण, स्मार्ट मीटर, पेपर लीक, पुलक पुलिया ढ़हि रहल अछि। राज्यमे भ्रष्टाचारक खेल चलि रहल अछि। जनता नीतीश कुमारसँ नाराज अछि।
जनतब जे प्रशांत किशोर कहने छलाह कि जँ ओ सत्तामे अओताह तऽ एक घंटामे शराब पर लागल प्रतिबंध हटा देताह। आब तेजस्वी यादव हुनक एहि बयान पर जवाब दैत कहलनि, “हुनकर पाछू गांधीजीक फोटो अछि आ ओ शराबबंदी समाप्त कऽ देताह। निक सोच अछि। अथवा ओ गांधीजीक फोटो हटा दैथि, कारण गांधीजी तऽ शराबबंदीक पक्षमे छलथि।
