एकता आ सौहार्दक संदेश दैत रंग-बिरंगी धागासँ बनाओल प्रतिमा छल आकर्षणक केंद्र
*
मुंबई समदिया
*
पोइसर, कंदिवली पूर्वमे अवस्थित रुब्रिक्स अकादमी परिसरमे मुंद्रिका फाउंडेशन द्वारा ०७ सँ ११ सितंबर धरि पाँच दिवसीय गणेशोत्सव सम्पन्न भेल। हर वर्षक भांति एहू बेर ई गणेश उत्सव अपन नव एवं विशेष पहल लेल चर्चित रहल।
मैथिल पुनर्जागरण प्रकाश समदियासँ बातचीतमे फाउंडेशनक संस्थापक प्रथमेश झा कहलनि – गणपतिक प्रतिमा पूर्ण रूपसँ इको-फ्रेंडली सामग्रीसँ बनाओल गेल अछि।एहि बेर गणपतिक प्रतिमा धागासँ बनाओल गेल अछि, जकर उद्देश्य समाजमे एकता आ सौहार्द बढ़ायब अछि।
प्रतिमाक विशेषता ई अछि जे एहिमे विभिन्न रंगक धागाक उपयोग कयल गेल अछि, जे विभिन्न धर्म आ जातिक प्रतिनिधित्व करैत अनेकतामे एकताक संदेश दऽ रहल अछि। केसरिया, हरियर, नील, लाल, उज्जर, पियर, बैंगनी आदि विविध जाति, धर्म, वर्ण आदिक प्रतीक एक संग गणपतिक प्रतिमाक रुपमे एकताक संदेश प्रतिपादित कऽ रहल अछि, जे भक्तगणमे सकारात्मक ऊर्जाक संचार कऽ रहल अछि, फलतः एकर चर्चा दुर-दुर धरि भेल अछि।
आगा ओ कहलनि – पहिल वर्षमे सिक्का आ एहिसँ पूर्वक वर्षमे पेंसिल केर छिलकासँ गणपतिक प्रतिमा बनाओल गेल छल आ एहि बेर धागासँ बनाओल गेल प्रतिमा एक नव प्रयास अछि, जे समाजमे एकताक संदेश प्रसारित करबाक उद्देश्य रखैत अछि।
मुंद्रिका फाउंडेशनक उद्देश्य अछि जे गणपति बप्पा केर एहि पावन पर्वक माध्यमसँ हम सभ धर्म आ जातिक लोककेँ एक संग जोड़ि सकी आ ई संदेश पसारि सकी जे हमर देश कखनो जाति आ धर्मक नाम पर नहिं बंटत।
एहि प्रयासमे बच्चा सभक विशेष योगदान रहल अछि। गणपतिक एहि अनोखा प्रतिमाक निर्माणमे संस्थापक प्रथमेश झा, सोनाली झा आ रिशु मिश्रा केर मार्गदर्शनमे शिवम झा, प्रशांत ठाकुर, विवेक झा, तिलक झा, कुनाल आगरे, शिवानी ठाकुर, साक्षी झा आदि बच्चा सभ योगदान देलक अछि। ई बच्चा सभ अपन मेहनत आ समर्पणसँ लगभग दू सप्ताहमे ई कार्य पूरा कयलक अछि।
बच्चा सभ विभिन्न रंगक धागा अपन सहपाठी आ पड़ोससँ एकत्रित कयलक अछि। धागा एकत्रित करबाक एहि कार्यमे आनंद ठाकुर, कृष्णा झा, हर्ष सिंह, अक्षय झा, सचिन पंडित, शिवानंद झा, सूरज मिश्रा, कृष्णा मिश्रा, आदित्य चौधरी, प्रगति झा, कुशुम मिश्रा, श्रेया झा, किशन ठाकुर, अमन मंडल, अजय पासवान, अंकुश झा महत्वपूर्ण भूमिका निभेलनि अछि।
मुंद्रिका फाउंडेशन द्वारा आयोजित एहि गणेश उत्सवमे ७ अगस्तसँ ११ अगस्त धरि आयोजित होमय वाला कार्यक्रममे संपर्कक प्रायः सभगोटे सादर आमंत्रण छलथि। एहि अवसर पर सभ सहभागी भ’ गणपति बप्पाक आशीर्वाद प्राप्त कयलनि आ एहि अनोखा प्रयासक हिस्सा बनलथि ।
मुंद्रिका फाउंडेशनक संस्थापक प्रथमेश झा आ पुरा टीम सभक स्वागतमे सतत तल्लीन छलथि।
