आबकारी नीति मामिलामे जमानत पर बाहर दिल्लीक मुख्यमंत्री अरविन्द केजरीवाल अपन पदसँ इस्तीफा देबाक घोषणा कयलनि अछि। आप कार्यालयमे पार्टी कार्यकर्ताकेँ संबोधित करैत केजरीवाल कहलनी कि हम आइसँ दू दिन बाद मुख्यमंत्री पदसँ इस्तीफा देब। हम मुख्यमंत्रीक कुर्सी पर ताबत धरि नहि बैसब जाबत धरि जनता अपन फैसला नहिं देत जे केजरीवाल ईमानदार छथि। हम दिल्लीक लोकक आदेशक बादे मुख्यमंत्रीक कुर्सी पर बैसब।
मुख्यमंत्री अरविंद केजरीवाल कहलनि, ‘हम दू दिन बाद मुख्यमंत्री पदसँ इस्तीफा देबय जा रहल छी। जाबत धरि जनता अपन फैसला नहिं दैत हम मुख्यमंत्रीक कुर्सी पर नहिं बैसब। ओ कहलनि जे हम आ मनीष सिसोदिया जनताक बीच जाएब। दिल्ली विधानसभा भंग नहिं होएत। हमर जगह पर दोसर मुख्यमंत्री होएत। अगिला मुख्यमंत्री चुनबाक लेल विधायक दलक बैसार होयत। एहिमे मुख्यमंत्री पर निर्णय लेल जाएत।
केजरीवालक जगह मुख्यमंत्री बनयमे आतिशीक नाम सूचीमे सबसँ आगू अछि। दिल्ली सरकारमे मंत्री आतिशी कालकाजी सीटसँ विधायक छथि। आतिशी दिल्ली सरकारमे शिक्षा, उच्च शिक्षा, टीटीई, वित्त, योजना, पीडब्ल्यूडी, जल, बिजली, सेवा, सतर्कता, जनसम्पर्क मंत्री छथि। सीएम केजरीवाल अपन इस्तीफाक घोषणा करबासँ पहिने आतिशीक उल्लेख सेहो कयलनि। ओ कहलनि “हम जेलसँ एलजीकेँ पत्र लिखने छलहुँ जे आतिशी स्वतन्त्रता दिवस पर झण्डा फहरौतीह। मुदा चिठ्ठी वापिस कऽ देल गेल आ इहो कहल गेल जे जँ फेरसँ पत्र लिखल जायत तँ परिवारक सङ्ग भेँट बन्द भऽ जायत।
ओतहि आतिशीक संग सौरभ भारद्वाज नाम सेहो सामने आबि रहल अछि। ओ दिल्लीक ग्रेटर कैलाश सीटसँ विधायक छथि। सौरभ दिल्ली सरकारमे स्वास्थ्य, शहरी विकास आ पर्यटन मंत्री छथि। सौरभ पार्टीक राष्ट्रीय प्रवक्ता सेहो छथि। एकर अतिरिक्त दिल्ली सरकारमे मंत्री गोपाल रायक नाम सेहो चर्चामे अछि। कैलाश गहलोतक नाम सेहो मुख्यमंत्री पदक दौड़मे चलि रहल अछि। आम आदमी पार्टीक विधायक कुलदीप कुमारक नाम सेहो एहि सूचीमे शामिल अछि। सीएम केजरीवालक पत्नी सुनीता केजरीवालक नामकेँ लऽ कऽ सेहो अटकलबाजी चलि रहल अछि। ओना अरविंद केजरीवाल कहलनि अछि जे विधायकसभक बैसार होयत आ मुख्यमंत्री के होयत ई तय होयत।
