सहरसामे कोसीक कहर, पूर्वी तटबन्धक भीतर स्कूल भेल ध्वस्त

सहरसा समदिया
*

सहरसाक कोसी पूर्वी तटबन्धक हाटी पंचायतक तटबन्धक भीतर एकटा राजकीय बुनियादी विद्यालयक दू मंजिला भवन नदीमे खसि पड़ल। पछिला दू माससँ पूर्वी तटबन्धक भीतर कतेको गाममे कोसीक कटाव कहर मचा रहल अछि। जाहि कारणेँ कतेको गामक सैकड़ो परिवारक घर कटि कऽ नदीमे मिलि गेल अछि। ओतहि हाटी पंचायतक सरकारी बुनियादी विद्यालय सेहो मंगल दिन भोरे कटि कऽ नदीमे खसि पड़ल। एहिसँ स्थानीय लोकमे बहुत आक्रोश उत्पन्न भेल अछि। संगहि स्कूल ढ़हलाक बाद आब हाटी गामक दिसि सीधा कटाव भयंकर भऽ गेल अछि। जाहि कारणेँ लोकमे भयक माहौल अछि।

पंचायत प्रमुख फुलेश्वर सदा कहलनि जे जल संसाधन विभागसँ लऽ कऽ जिला प्रशासन धरि ओ कतेको दिनसँ कटाव-रोधी काजक माँग कऽ रहल छथि। मुदा गुणवत्तापूर्ण काजक अभावमे आइ ई दिन देखल जा रहल अछि। स्थानीय दीवाना सिंह कहलनि जे ई कटाव स्कूलसँ ५०० मीटरसँ बेसी दूर भऽ रहल अछि। संगहि हम क्षेत्रीय प्रशासन, जिला प्रशासन आ जल संसाधन विभागसँ कटाव रोधी काज करबाक मांग कऽ रहल छलहुँ, जाहिसँ स्कूलकेँ बचायल जा सकय आ गामकेँ सेहो कटावसँ बचायल जा सकय। मुदा नहिं तऽ जिला प्रशासन ध्यान देलक आ ने जल संसाधन विभागक अधिकारी सभ ध्यान रखलनि। जाहि कारणेँ स्कूलक जमीन आ दू मंजिला भवन सहित सैकड़ो एकड़ उपजाऊ जमीन कटि कऽ नदीमे खसि पड़ल। संगहि कटाव आब सीधा गाम दिसि मुड़ि गेल अछि। जतय हजारो परिवार कटावक खतरामे अछि। मुदा एखन विभाग द्वारा कटावकेँ तत्काल रोकबाक लेल कोनो ठोस कदम नहिं उठायल जा रहल अछि।

स्थानीय शिवनन्दन यादव कहलनि जे सहरसा जिलाक मात्र दूटा विद्यालयकेँ सरकारी बेसिक स्कूलक दर्जा भेटल। एकटा सोहामे आ दोसर हाटीमे। मुदा प्रशासनिक उपेक्षाक कारण विद्यालय कटि गेल आ नदीमे मिल गेल।

१९५० मे हाटीक निवासी आरटी सिंह, जे डीएम के पद पर तैनात छलाह, अपन चारि एकड़ जमीन अपन गामक बच्चासभकेँ शिक्षित होबय आ समग्र शिक्षा प्राप्त करबाक लेल दान देलनि आ गाममे एकटा विद्यालयक स्थापना कयलनि। 2005 मे मुख्यमंत्री नीतीश कुमार 19 लाखसँ बेसी लागतसँ दू मंजिला भवनक निर्माण कयलनि। ओहि समयमे सैकड़ो स्थानीय बच्चा बेसिक स्कूलमे शिक्षा प्राप्त करैत छल। आब ओतए केर बच्चा सब शिक्षाक लेल लालायित रहत।

पंससक प्रतिनिधि चन्द्र किशोर यादव कहलनि जे गामक धरोहर बुनियाद विद्यालय छल। जतए बच्चा पढ़ैत छल। मुदा आँखिक सोझाँ विद्यालयक जमीन आ भवन कटि कऽ नदीमे मिलि गेल। जल संसाधन विभाग चन्द्रयान प्रभागक

कनिष्ठ अभियन्ता सुनील कुमार कहलनि जे ५ सितम्बर धरि विद्यालय एकदम सुरक्षित छल। मुदा ६ दिसम्बरकेँ नदीक डिस्चार्ज अचानक बढ़ि गेल, नदीक दिशा बदललाक कारण ई कटाव भेल अछि। सोमदिन हम सभ स्कूल लग कटाव-रोधी काज करय गेलहुं। जाहिसँ कम सs कम स्कूलक बाद गाम नहिं कटय। गाम बचबाक चाही। मुदा ओतय केर लोक आक्रोशित भऽ हुनका सभकेँ काज नहिं करय देलनि।