राजनीति चुनल सरकारकेँ चोर दरवाजासँ बर्खास्त करय चाहैत अछि भाजपा : आतिशी Maithil Punarjagran Prakash September 11, 2024 0 Comments नई दिल्ली * दिल्लीमे राष्ट्रपति शासन लागू करबाक माँग करैत भाजपा विधायक द्वारा राष्ट्रपतिकेँ पठाओल गेल पत्रपर राजनीतिक हंगामा जारी अछि। मंगलदिन दिल्ली सरकारक मंत्री आतिशी कहलनि जे भाजपा दिल्लीक निर्वाचित सरकारकेँ चोर दरवाजासँ बर्खास्त करय चाहैत अछि। आतिशी कहलनि जे भाजपाक एकमात्र काज निर्वाचित विपक्षी सरकारकेँ गिरायब अछि। भाजपा दिल्लीमे आम आदमी पार्टीक विधायककेँ नहिं खरीदि सकल, तेँ आब ओ दिल्लीक निर्वाचित सरकारकेँ गिराबयक षड्यंत्र कऽ रहल अछि। जँ भाजपा अरविन्द केजरीवाल सरकारकेँ गिराबय लेल षड्यन्त्र करैत अछि तखन दिल्लीक जनता आबयवला चुनावमे भाजपाकेँ मुंहतोड़ जवाब देत। ओ कहलनि जे जँ दिल्लीमे राष्ट्रपति शासन लगाओल जायत तँ आगामी विधानसभा चुनावमे भाजपाकेँ शून्य सीट भेटत। भाजपाक एकमात्र काज निर्वाचित सरकारकेँ गिरायब अछि। जतय भाजपा चुनाव नहिं जीतैत अछि, ओ विधायककेँ खरीद-बिक्री करबाक प्रयास करैत अछि, चोर दरवाजासँ सरकार बनयबाक प्रयास करैत अछि।दिल्लीमे सेहो भाजपा वैऽह काज कयलक, मुदा सफल नहिं भऽ सकल। ओ आम आदमी पार्टीक विधायक नहिं कीनि सकल, तेँ आब ओ चोर दरवाजासँ सरकार गिरयबाक षड्यंत्र कऽ रहल अछि। आतिशी कहलनि, “हम भाजपाकेँ कहैत छी जे दिल्लीक जनता एहि सब षड्यंत्र पर नजरि राखि रहल अछि। ओ जनैत अछि कि जँ हुनका लेल कोनो एक व्यक्ति काज करैत अछि तँ ओ छथि अरविन्द केजरीवाल। जँ हुनका २४ घंटा आ मुफ्त बिजली, अपन बच्चाक लेल नीक स्कूल, मोहल्ला क्लिनिकमे मुफ्त इलाज भेटैत अछि तऽ ई मात्र अरविन्द केजरीवालक कारण अछि।” ओ कहलनि, “मुख्यमंत्री अरविंद केजरीवाल बेटा बनि दिल्लीक सेवा कयने छथि, तेँ भाजपा हुनकासँ डरैत अछि। जँ भाजपा षड्यंत्र रचि अरविंद केजरीवाल सरकार केर गिरा देत, तऽ दिल्लीक जनता आबय वाला चुनावमे भाजपाकेँ मुंहतोड़ जवाब देत, आ भाजपाक सफाया भऽ जाएत।” Spread the love