प्रधानमंत्री नरेन्द्र मोदी शुक्रदिन अपन निवास पर राष्ट्रीय शिक्षक पुरस्कार प्राप्तकर्तासभसँ भेंट कयलनि। प्रधानमंत्री मोदी एहि बातचीतक पूरा वीडियो सोशल मीडिया प्लेटफॉर्म ‘एक्स’ पर सेहो साझा कयने छथि। एहि बैसारक दौरान प्रधानमंत्री मोदी कहलनि जे भारतक भविष्यकेँ आकार देबामे शिक्षकक भूमिका महत्वपूर्ण अछि।
एक्स पर वीडियो पोस्टक दौरान पीएम मोदी कैप्शन देलखिन, ” राष्ट्रीय शिक्षक पुरस्कारसँ सम्मानित उत्कृष्ट शिक्षकसभसँ भेंट कऽ सम्मानित महसूस कऽ रहल छी। युवाकेँ आकार देबाक प्रति हुनक जुनून आ समर्पण वास्तवमे प्रेरणादायक अछि।”
प्रधानमंत्री शिक्षकसभसँ कहलनि जे ओ अपन पाठमे स्थानीय लोककथाकेँ सम्मिलित करथि, आ एकरा अलग-अलग भाषामे पढ़ाउ, जाहिसँ छात्र कतेको भाषा सीखि सकथि, आ हमर समृद्ध संस्कृतिक अनुभव कऽ सकथि। ओ कहलनि, “स्थानीय लोककथाकेँ अलग-अलग भाषामे पढ़ाउ जाहिसँ छात्रलोकनि हमर सांस्कृतिक विविधताक अनुभव कऽ सकथि।”
आगू, प्रधानमंत्री मोदी सुझाव देलनि जे शिक्षकसभ छात्रसभकेँ भारतक विविधताकेँ बुझयबाक लेल शैक्षिक यात्राक आयोजन करथि। ओ कहलनि जे एहि तरहक गतिविधिसँ नहिं मात्र शिक्षामे सुधार होयत बल्कि स्थानीय पर्यटन आ अर्थव्यवस्थाकेँ सेहो बढ़ावा भेटत।
प्रधानमंत्री पुरस्कार विजेता शिक्षकसभसँ सेहो अपील कयलनि जे ओ अपन शिक्षण पद्धतिकेँ सोशल मीडियाक माध्यमसँ साझा करथि जाहिसँ अन्य साथी शिक्षकलोकनि सेहो एहि अनुभवसँ लाभान्वित भऽ सकथि। प्रधानमंत्री मोदी शिक्षकसभक समर्पणक सराहना कयलनि आ राष्ट्र निर्माणमे महत्वपूर्ण भूमिकाक लेल हुनका बधाई देलनि।
पीएम मोदी कहलनि, “हमर दृढ़ विश्वास अछि जे देशक विकास यात्रामे शिक्षकक बहुत महत्वपूर्ण योगदान अछि। मुदा हमरा लगैत अछि जे वाहवाहीक आवश्यकता नहिं अछि। हमरा सभकेँ ओहि छात्रकेँ देखी जे ओकर परिवार बच्चाकेँ कतेक विश्वासक सङ्ग हमरासभकेँ सौंपलक अछि। बच्चाकेँ मात्र पढ़ाबय लेल शिक्षककेँ नहि सौंपल जाइत अछि, बल्कि ओकरा देल जा रहल शिक्षाकेँ प्लस वन करवाक लेल इ कयल जाइत अछि। अतः शिक्षक बच्चाक जीवनमे ई काज करैत छथि।”
जनतब जे, एहिसँ पहिने राष्ट्रपति द्रौपदी मुर्मू शिक्षक दिवसक अवसर पर ८२ शिक्षककेँ शिक्षाक क्षेत्रमे हुनक योगदानक लेल सम्मानित कयने छलथि।
