छत्तीसगढ़क दंतेवाड़ा आ बीजापुरक सीमापर स्थित घनघोर जंगलमे सुरक्षा बल आ नक्सलीक बीच एकटा पैघ मुठभेड़ भेल, जाहिमे ९ नक्सली मारल गेल। ई मुठभेड़ मंगलकेँ भोरमे तखन शुरू भेल जखन सुरक्षा बलक एकटा टीम नक्सल प्रभावित क्षेत्रमे तलाशी अभियान चला रहल छल।
पुलिस सूत्र मंगलकेँ छत्तीसगढ़क दंतेवाड़ा-बीजापुर सीमा पर जंगलमे मुठभेड़ अभियानक दौरान नौ माओवादीक मारल जयबाक पुष्टि कयलक। पुलिस कहलक जे माओवादी लगसँ स्वचालित हथियार बरामद भेल अछि।
दंतेवाड़ाक एसपी गौरव राय कहलनि जे माओवादी लगसँ पैघ संख्यामे एसएलआर राइफल, .३०३ राइफल आ .३१५ बोर राइफल बरामद कयल गेल अछि। अभियानमे शामिल सभ सुरक्षा बल सुरक्षित कहल जा रहल अछि। इलाकामे तलाशी अभियान चलि रहल अछि। ऑपरेशन पूरा भेलाक बाद विस्तृत रिपोर्ट जारी कएल जाएत।
एहिसँ पहिने पश्चिम बस्तर संभागक माओवादीक उपस्थितिक सूचनाक बाद संयुक्त पुलिस दल दंतेवाड़ा आ बीजापुर जिलाक सीमावर्ती क्षेत्रमे तलाशी अभियान पर चलि गेल। पुलिस बल आ माओवादीक बीच मंगलकेँ भोर १०:३० बजे मुठभेड़ शुरू भेल।
केन्द्रीय गृह मंत्री २४ अगस्तकेँ छत्तीसगढ़क रायपुरमे छत्तीसगढ़ आ पड़ोसी राज्यक मुख्य सचिव आ पुलिस महानिदेशकक संग वामपंथी उग्रवाद (एलडब्ल्यूई) पर समीक्षा बैठक आ अंतरराज्यीय समन्वय बैठक केर अध्यक्षता करैत कहलनि कि वामपंथी उग्रवादक खिलाफ अभियान आब निर्णायक मोड़ पर अछि आ हम मार्च २०२६ सँ पहिने देशसँ नक्सलवाद केर पूर्ण रूपसँ समाप्त करय लेल प्रतिबद्ध छी।
